Juventusi nuk shkoi më shumë se barazimi 1-1 në fushën e Vilarrealit, duke e lënë gjithçka të hapur sa i takon kualifikimit në Champions. Sfida nisi shumë mirë për italianët, të cilët shënuan që në ‘tunel’, por ‘Nëndetësja e verdhë’ nuk u dorëzua dhe barazoi në pjesën e dytë.
Sulmuesit serb, Dushan Vlahoviç, i mjaftuan 32 sekonda për të çuar topin në rrjetë pa e parë portën. Ndeshja e parë në Europë për të, prekja e parë e topit dhe goli i parë. Më mirë se kaq nuk mund të niste ndeshja për të dhe Juventusin në Spanjë.
Vilarreali reagoi mirë dhe ia doli të barazonte me Dani Parejon në pjesën e dytë. Zëvendësimet e Alegrit, i cili hodhi në fushë Bonuçin, Artur dhe Zakarian, nuk dhanë rezultat. Vlahoviç iu afrua golit në minutat e fundit, por u ndal nga Ruli. Për këtë transfertë berdhinjtë nuk kishin të gatshëm Dibalën, Kiezën, Kielinin dhe Bernardeskin, mungesa shumë të rëndësishme.
Në ndeshjen tjetër, Çelsi zgjidhi gjithçka me lehtësi ndaj Lilës. Kai Havertz në pjesën e parë dhe Pulisiç në të dytën shënuan golat e fitores për londinezët, të cilët kanë hedhur një hap të sigurt drejt kualifikimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
