Për kuqezinjtë ishte sot dita e tretë e përgatitjeve për ndeshjen e së enjtes me Poloninë. Ata janë grumbulluar që të dielën në Varshavë, por grupi i futbollistëve është kompletuar të hënën.
Trajneri Reja dhe stafi i tij kanë zhvilluar sot seancën e radhës, ku të gjithë ishin të gatshëm. Çdo gjë ka shkuar mirë dhe nuk ka pasur probleme fizike për asnjë lojtar. Për kuqezinjtë ka mbetur edhe një seancë e fundit para ndeshjes, ajo që do të zhvillohet të mërkurën, kur trajneri Reja do të japë edhe udhëzimet e fundit tekniko-taktike, si dhe do të vendosë pë rata që do të zbresin në fushë nga minuta e parë ndaj Polonisë.
Ivan Balliu, një nga lojtarët që trajneri Reja e kishte në listë dhe priste një përgjigje përfundimtare, ka hedhur poshtë zërat për qejfmbetje dhe ka bërë të ditur me anë të rrjeteve sociale se e ka të pamundur fizikisht të bashkohet me Kombëtaren. Ai nuk do të jetë pjesë e skuadrës për këto tri ndeshje, ashtu si dhe Taulant Xhaka, që nuk e ka pranuar ftesën e Rejës për arsye shëndetësore.
“Të nderuar fansa dhe miq shqiptarë, siç e keni dëgjuar, këtë herë nuk jam pjesë e ekipit kombëtar. Sidoqoftë, kjo nuk ka të bëjë me faktin se unë nuk dua, por trupit tim i duhet kohë që të rigjenerohet në mënyrë që të parandalojë më keq. Jam gjithmonë krenar të vesh fanellën kuqezi dhe ta përfaqësoj tokën e rrënjët e mia me gjithë shpirt. Përjetësisht me ty Shqipëri! Me respekt Ivan Balliu!”, – ka shkruar Balliu në profilin e tij në Tuiter.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
