Gazeta Si – Pasditen e kësaj të shtune është riaktivizuar zjarri në pyllin me pisha në Peshtan të Fierit. Burime nga ky fshat pohojnë se flakët po përhapen me shpejtësi për shkak të terrenit “grykë” dhe të erërave të forta që ndihmojnë përhapjen e flakëve.
Nga zjarri i djeshëm kishte mbetur një vatër zjarri, e cila është riaktivizuar duke shkaktuar vatra të tjera.
Tre grupe zjarrfikëse janë në terren, ndërsa po kërkohen përforcime nga repartet e zjarrfiksëve të Patosit fqinj.
Zjarri po përhapet me shpejtësi në një sipërfaqe të gjerë, duke rrezikuar rrugën e vjetër rurale Fier – Cakran në vendin e quajtur “Qafa e Shkozës”.
“Fillimisht priten ndihma nga kolegët e Patosit dhe në qoftë se situata vazhdon e njëjtë do kërkohet ndihmë nga helikopteri si një ditë më parë”, ka përfunduar shefi zjarrfikseve të bashkisë Fier Zija Hyka.
Terreni është shumë i vështirë, automjetet nuk shkojnë deri afër vatrave të zjarrit dhe punonjësit luftojnë me flakët me pompa uji në shpinë dhe mjete rrethanore, kazma e lopata për të shuar zjarrin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
