Në seancën e dytë stërvitore të zhvilluar në Barcelonë, ku Kombëtarja është grumbulluar, trajneri Reja e ka pasur grupin të plotë. Me skuadrën janë bashkuar mbrëmjen e së hënës edhe Etrit Berisha, Federik Veseli dhe Mario Mitaj, të cilët sot ishin në dispozicion të trajnerit kuqezi.
Stafi teknik i Kombëtares ka parë me kujdes gjendjen e të gjithë futbollistëve në prag të ndeshjes me Andorrën. Pozitiv është fakti se asnjë futbollist nuk ka probleme fizike dhe trajneri Reja mund të bëjë i qetë llogaritë për transfertën e së enjtes, por edhe për ndeshjen pasardhëse me Anglinë në “Air Albania Stadium”.
Mëngjesin e së mërkurës, sipas programit, kuqezinjtë do të lënë Barcelonën dhe do të udhëtojnë drejt Andorrës. Seanca e fundit stërvitore do të zhvillohet në stadiumin, ku të enjten do të luahte ndeshja e parë kualifikuese e Katar 2022 nga Kombëtarja jonë. Nesër trajneri Reja dhe kapiteni Berisha pritet të dalin në konferencë për shtyp.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
