Milani nuk i ndahet Napolit në kreun e tabelës së klasifikimit. Me fitoren në transfertë ndaj Atalantës, skuadra e Stefano Piolit mbetet sërish 2 pikë pas Napolit, që sot mundi edhe Fiorentinën, duke i bërë 7 fitore në 7 ndeshje.
Në ndeshjen mbyllëse të javës së 7-të të Serisë A, Milani ia ka dalë të triumfojë 2-3 në një fushë shumë të vështirë si ajo e Atalantës. Nisja e ndeshjes ishte shumë e mirë për kuqezinjtë, të cilët kaluan në avantazh pas vetëm 28 sekondash me Kalabrian, që mbante edhe shiritin e kapitenit.
“Dea” provoi të reagonte dhe të barazonte, por portieri Maignan u tha “jo” Zapatës dhe Xapakostës. Në fundin e pjesës së parë Freuler bëri një gabim të rëndë, Tonali i rrëmbeu topin dhe nuk fali përballë Musos, duke i dhënë goditjen e dytë Atalantës në një moment delikat.
Gjatë pjesës së dytë erdhi edhe goli i tretë për Milanin me autor Rafael Leaon. Fundi i ndeshjes për pak sa nuk solli surprizën. Zapata shkurtoi fillimisht me penallti, kurse në minutën e 4-t shtesë Pasaliç shënoi edhe golin e dytë për Atalantën. Nëse do të kishte ende minuta, situata do të komplikohej për Melanin, që ka dalë me 3 pikë nga një fushë shumë e fortë. Mbrojtësi i Kombëtares, Berat Gjimshiti, luajti 90 minuta në këtë ndeshje dhe u vlerësua me notën 6.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
