Video/ Itali e mrekullueshme, Barela dhe Insinje eliminojnë Belgjikën

Italia mund Belgjikën 2-1 dhe shkon në gjysmëfinale të Euro 2020. “Axurrët” shënojnë 2 gola të mrekullueshëm me Barelën dhe Insinjen në pjesën e parë, para se Lukaku të shkurtonte diferencën në 2-1 me penallti. Djemtë e Mançinit dominojnë në fushë, vuajnë në fund, por ruajnë rezultatin dhe tani ndeshen me Spanjën në “Wembley” më 6 korrik.

Mançini vendosi të aktivizonte Kielinin titullar dhe kapiteni bëri një ndeshje shumë të mirë. Titullar luajti edhe Kieza në vend të Berardit, siç ishte paralajmëruar. Martinez zgjodhi Dokun në vend të Eden Hazardit, ndërsa De Bryjne sakrifikoi për të qenë në fushë në këtë ndeshje.

Bonuçi shënoi që në fillim të ndeshjes, por VAR-i hoqi kënaqësinë e golit atij dhe gjithë italianëve. Gjithsesi, goli do të vinte për skuadrën e Mançinit. Barela gjuan saktë pasi hyn në zonë dhe 0-1. Nga ana e belgëve vetëm një goditje nga distanca e De Bryjne, e neutralizuar nga Donaruma.

Lorenco Insinje dyfishon për Italinë me një goditje të stilit të tij, duke mposhtur Tibo Kurtua. Italianët në delir, por Belgjika rifutet në lojë në fundin e pjesës së parë me një penallti të fituar nga Doku, të konfirmuar nga VAR-i dhe të ekzekutuar saktë nga Romelu Lukaku. Sulmuesi i Interit humb një rast të artë për të barazuar në pjesën e dytë, shumë afër vijës së portës, ku shpëtimtar bëhet Spinacola.

Mançini i vonon ndërimet deri në minutën e 74-t, kur aktivizon Kristanten dhe Belotin, më pas edhe Berardin dhe Emerson Palmierin, ky i fundit për të zëvendësuar Spinacolën, që pëson një dëmtim të rëndë. Nga fusha për dëmtim ka dalë edhe Çadli te Belgjika, 5 minuta pasi u fut në fushë. Doku përpiqet për belgët, por pa mundur të shënojë.

Belgjikë-Itali 1-2
Belgjika (3-4-2-1): Kurtua, Alderveireld, Varmaelen, Vertonghen, Meunier (Çadli, Praet), Vitsel, Tielemans (Mertens), T.Hazard, De Bryjne, Doku, Lukaku. Trajner: Martinez
Italia (4-3-3): Donaruma, Di Lorenco, Bonuçi, Kielini, Spinacola (Emerson), Verrati (Kristante), Zhorzhinjo, Barela, Kieza (Toloi), Imobile (Beloti), Insinje (Berardi). Trajner: Mançini
Arbitër: Vinçiç (Slloveni)
Shënues: Barela 31', Insinje 44’, Lukaku 45’ (penallti)

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.