Ljuis Hemilton është shpallur sot kampion bote i Formulës 1 për herë të shtatë në karrierë, duke barazuar gjermanin Mikael Shumaker. “Është diçka që shkon përtej ëndrrës”, – u shpreh piloti anglez pas triumfit në Stamboll, ku ai ishte fenomenal në administrimin e gomave.
Hemilton është tashmë piloti më fitues i Formulës 1, pas suksesit në “Çmimin e Madh” të Turqisë. Ka 7 tituj kampion bote, ashtu si Shumaker, por duhet konsideruar përpara tij, falë 94 fitoreve dhe 97 “pole position”-ene në karrierë. Një arritje e madhe, që pritet të pasurohet në vazhdim. Anglezi donte ta fsetonte që sot titullin kampion dhe ia arriti qëllimit me një magji, me një administrim të jashtëzakonshëm të garës, ku në pistën e lagësht ai bëri 50 xhiro me goma mesatare.
Piloti i Mercedesit e kaloi finishin para Racing Point të Serxho Perez dhe Ferrarit të Sebastian Fetel, i cili me shumë sportivitet shkoi të përgëzonte Hemiltonin, më të madhin e këtij sporti. Ishte një garë “e çmendur”, e kushtëzuar nga shiu që ra para nisjes. Në fazën e parë të garës, dy makinat Racing Point të Stroll dhe Perez dukeshin të pakapshme, pasi makinat e tjera, Ferrari i Fetelit, Red Bull i Vershtapen dhe Hemiltoni, patën vështirësi.
Më pas erdhi kthesa, ku anglezi arriti të afrohej, të sulmonte dhe të kalonte Perezin. Në pjesën e dytë të garës, sapo mori kryesimin, Hemilton vendosi të vazhdonte më po ato goma deri në fund dhe ato 50 xhiro treguan gjithë madhështinë e tij. Edhe Fetel e mbylli në pod, por rrezikoi ta humbiste pas ndërrimit të dytë të gomave, që kur ai dhe Stroll, dominues për 36 xhiro, nuk e gjetën më ritmin. Garë e mirë edhe për McLaren e Sainz, që zuri vendin e pestë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
