Gazeta Si - Fati është me Eintraht Frankurt. Festa e gjitha për gjermanët në finalen e Ligës së Europës, e para nga tri finalet europiane të këtij sezoni. Ata mundën me penallti Gllasgou Rejnxhërs në “Sanchez Pizjuan” të Sevlijes, me rezultatin 6-5 (pas penalltive).
Tifozët e Eintraht Frankfurt krijuan një atmosferë dhe një koreografi fantastike në stadiumin e Seviljes. Ata gjithashtu pushtuan edhe stadiumin e tyre në Frankfurt. Ia vlejti, sepse festa në fund ishte për ta.
Koha e rregullt u mbyll në barazim, 1-1. Pas një pjese të parë të ekuilibruar, Aribo kaloi skocezët në avantazh, duke përfituar nga një gabim i mbrojtjes së Eintrahtit.
Gjermanët reaguan dhe barazuan shpejt me anë të Rafael Borre. Më parë, kur rezultati ishte 0-0, atyre iu anulua një penallti nga VAR-i. Minutat e fundit të kohës së rregullt, të dyja skuadrat bënë pak për të gjetur fitoren. Mbizotëroi frika e humbjes.
Të dy trajnerët u rezervuan për ndërrimet gjatë ndeshjes, duke parashikuar shtesat. Ata bënë nga dy lëvizje fillimisht dhe në 30 minutat shtesë edhe të tjerat. Asgjë nuk ndryshoi dhe fituesi iu la pikës së bardhë të penalltive.
Nga 10 penallti të gjuajtura, i vetmi që gaboi ishte një emër i njohur, Aron Ramsei i Rejnxhërs. Gjuajtja e tij u prit nga portieri Trap, i cili ishte vendimtar në fitimin e trofeut nga gjermanët.
Congratulations Frankfurt, 2021/22 Europa League champions! 👏🏆#UELfinal pic.twitter.com/ZiZUfkRUs3
— #UELfinal (@EuropaLeague) May 18, 2022
Eintraht Franktfurt e ka merituar këtë trofe. Ekipi i drejtuar nga trajneri austriak, Oliver Glasner, ka eliminuar kundërshtarë si Barcelona dhe Uest Hem.
Para ndeshjes, në qytetin e Seviljes pati edhe përplasje fizike mes dy tifozërive. Madje, u shënuan edhe disa episode dhune, me grushte dhe goditje karrige mes tifozëve që kishin pushtuar qytetin spanjoll.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
