Trajneri i Kombëtares U-21, Alban Bushi, ka shpallur sot listën e të grumbulluarve për dy ndeshjet e radhës kualifikuese të Europianit, ato me Andorrën dhe Slloveninë, që zhvillohen përkatësisht më 7 dhe 11 tetor, të dyja në vendin tonë.
Në listë bie menjëherë në sy prania e tre futbollistëve të grumbulluar kohët e fundit edhe nga trajneri Edi Reja. Ata janë mbrojtësi Ramen Çepele, mesfushori Mario Mitaj dhe sulmuesi Ernest Muçi, i cili po paraqitet shumë mirë me Legian e Varshavës. Trajneri Bushi ka grumbulluar gjithashtu edhe sulmuesin e Vllaznisë, Mehdi Çoba.
Gjatë konferencës për shtyp, ku shpalli edhe listën, trajneri i kuqezinjve ka theksuar se kërkohet përqendrim maksimal në çdo ndeshje, edhe ndaj Andorrës, për të arritur objektivin. Shqipëria U-21 bën pjesë në Grupin G bashkë me Çekinë, Anglinë, Slloveninë, Kosovën dhe Andorrën. Në 2 ndeshjet e para, skuadra e Bushit ka mundur Andorrën 3-0 dhe ka humbur 4-0 me Çekinë. Kuqezinjtë mbajnë vendin e 4-t, me 3 pikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
