Nuk ka shkuar më shumë se barazimi as Tirana në ndeshjen e javës së dytë me Egnatian dhe ky është blofi më i madh deri tani. Bardheblutë vuajtën për të shënuar ndaj debutuesve në Superiore, gjetën golin me Seferin, por u barazuan shpejt. VAR-i i anuloi Tiranës një tjetër gol të Seferit dhe pas javës së dytë skuadra e Shehit ka 4 pikë. Egnatia ka marrë pikën e parë.
Tirana arriti ta zhbllokonte rezultatin në fillim të pjesës së dytë, pas një gjuajtje të bukur nga jashtë zonës të Taulant Seferit. Por me një gol po kaq të bukur u përgjigj Egnatia, që barazoi shifrat me Demir Imerin, duke e shuar gëzimin e kryeqytetasve brenda pak minutash.
Seferi shënoi edhe një gol tjetër për Tiranën, që u anulua nga VAR-i pas disa minutash ankthi te skuadrë e Shehit. Arbitrit Laver Alla iu deshën rreth 5 minuta për të vendosur. Në momentin që Seferi gjuajti drejt portës, Xhixha ishte në pozicion jashtë loje dhe në rrezen e portierit, ndaj dhe goli u vlerësua i parregullt.
Më pas Tirana u përpoq shumë për të gjetur golin e fitores, por nuk pati qartësinë e duhur për të shtyrë topin në rrjetë me Xhixhën dhe Ngo. Sulmuesi anglez pretendoi edhe për një penallti gjatë kohës shtesë, por në këtë rast VAR-i nuk ndërhyri. Pas 8 minutash shtesë, gjithçka u mbyll në barazim, 1-1.
Ishte barazimi i katërt në po kaq ndeshje të luajtura të javës së dytë të Superiores dhe të gjitha me të njëjtin rezultat, 1-1. Kukësi është ekipi që ka një mundësi për ta prishur këtë seri, nëse mund Kastriotin.
Abissnet Superiore, java e 2-të
Sot
Tirana-Egnatia 1-1
Kukësi-Kastrioti
Të shtunën
Skënderbeu-Partizani 1-1
Vllaznia-Teuta 1-1
Të premten
Dinamo-Laçi 1-1
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
