Katër persona janë vënë nën hetim nga policia e Korçës, pasi prishën qetësinë publike dhe shqetësuan banorët duke vendosur muzikë të lartë në ambientet e një lokali.
Nga kontrollet e ushtruara në disa lokale në Korçë, me qëllim parandalimin e muzikës së lartë është konstatuar një rast i paligjshmërisë në këtë fushë.
Në një lokal në lagjen nr. 4, Korçë, është konstatuar muzikë e lartë dhe policia ka nisur hetimin në gjendje të lirë, për shtetasit M. Z (pronari i lokalit), A. H; A. Zh. dhe M. Ç., muzikantë në këtë lokal.
Gjithashtu gjatë verifikimeve të kryera rezultoi se tre muzikantët nuk ishin të deklaruar në skemën e sigurimeve shoqërore, si të punësuar në këtë lokal.
Në cilësinë e provës materiale u sekuestruan pajisjet që gjeneronin muzikën.
Materialet procedurale i kaluan Prokurorisë Korçë, për veprime të mëtejshme.
Ndër të tjera, Policia e Shtetit apelon për të gjithë administratorët dhe pronarët e lokaleve dhe hoteleve, që të zbatojnë me rigorozitet ligjin dhe rregullat në lidhje me ndotjen akustike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.