.png)
Nga Gazeta 'Si'- Kreu i Grupit të PD-së, Gazment Bardhi ka reaguar pas vendimit të Gjykatës Kushtetuese për kryedemokratin Sali Berisha.
“Vendimi i djeshëm i Gjykatës Kushtetuese konfirmon atë që kam thënë prej ditës së parë se masa e ‘arrestit në shtëpi’ ndaj kryetarit të Partisë Demokratike Sali Berisha është tërësisht e joproporcionale”, shprehet Bardhi në një postim në rrjetet sociale.
Teksa analizoi vendimin e Kushtetueses, Bardhi shprehet se nëse masa “ndalim i daljes jashtë vendit” është konsideruar joproporcionale dhe antikushtetuese, sipas tij, atëherë edhe masa më e rëndë e “arrestit në shtëpi” është disafish më e panevojshme dhe më joproporcionale, për rrjedhojë thellësisht antikushtetuese.
“Gjykata Kushtetuese është shprehur dhe nën dritën e këtij zhvillimi të ri, SPAK dhe GJKKKO duhet që, nën frymën, standardin dhe logjikën e vendimit të Gjykatës Kushtetuese, pra në përputhje me vetë Kushtetutën, të procedojnë menjëherë dhe pa vonesa me revokimin e masës joproporcionale të “arrestit në shtëpi” ndaj Sali Berishës”, theksoi Kreu i Grupit të PD-së.
Bardhi shton se çdo vonesë e mëtejshme do të minonte demokracinë, duke theksuar “326 ditë pengesë antikushtetuese e aktivitetit politik të Linderit të opozitës janë mjaftueshmërisht të rënda për të toleruar të bëhen 327 ditë apo më shumë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
