Finlanda planifikon të ofrojë vaksinim parandalues kundër gripit të shpendëve javën e ardhshme për disa punonjës që janë të ekspozuar ndaj kafshëve, duke e bërë atë vendin e parë në botë që vaksinon njerëzit kundër gripit të shpendëve.
Vendi nordik ka blerë vaksina për 10,000 njerëz, secila e përbërë nga dy injeksione, si pjesë e një marrëveshje të përbashkët me BE.
Komisioni Evropian tha se Finlanda do të jetë vendi i parë që do të përdorë vaksinën.
“Vaksina do t'u ofrohet atyre të moshës 18 vjeç e lart që janë në rrezik të shtuar të prekjes nga gripi i shpendëve për shkak të punës së tyre ose rrethanave të tjera”, tha në një deklaratë Instituti Finlandez për Shëndetin dhe Mirëqenien (THL).
Lloji H5N1 i gripit të shpendëve ka vrarë ose ka shkaktuar asgjësimin e qindra miliona shpendëve në mbarë botën vitet e fundit dhe është përhapur gjithnjë e më shumë te gjitarët dhe, në disa raste, edhe te njerëzit.
Finlanda nuk e ka zbuluar virusin te njerëzit, megjithatë, vendi është i vendosur për të filluar vaksinimin duke pasur parasysh rreziqet e transmetimit.
“Kushtet në Finlandë janë shumë të ndryshme pasi ne kemi shumë ferma kafshësh”, i tha Reuters mjekja Hanna Nohynek në Institutin Finlandez për Shëndetin dhe Mirëqenien (THL).
Shpërthimet e përhapura të gripit të shpendëve në Finlandë çuan në asgjësimin vitin e kaluar të rreth 485,000 kafshëve për të ndaluar përhapjen e virusit midis kafshëve dhe njerëzve.
Vaksinimet ka të ngjarë të fillojnë që në fillim të javës së ardhshme në të paktën disa pjesë të Finlandës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.