Nga Gazeta Si – Vendet në jug më të rrezikuara, me rritje që ka gjasa të tejkalojë rënien e vdekjeve nga të ftohtit nëse ngrohja globale arrin 3 ose 4 gradë Celsius më shumë.
Vdekjet nga nxehtësia në Evropë mund të trefishohen deri në fund të shekullit, me numrat që rriten në mënyrë disproporcionale në vendet e Evropës Jugore si Italia, Greqia dhe Spanja, ka zbuluar një studim.
I ftohti vret më shumë njerëz sesa nxehtësia në Evropë, dhe disa kanë argumentuar se ndryshimi i klimës do të ndryshojë shifrat. Studimi, i botuar në Lancet Public Health, zbuloi se numri i të vdekurve mund të rritet për shkak të ngrohjes globale, me njerëzit që po bëhen më të cënueshëm ndaj temperaturave të larta.
Nëse ngrohja globale rritet me 3 ose 4 gradë Celsius mbi nivelet para-industriale, përfunduan studiuesit, rritja e vdekjeve nga nxehtësia do të tejkalojë ndjeshëm rënien e vdekjeve nga të ftohtit.
Studiuesit thanë se rezultatet sugjeruan se ndryshimi i klimës mund të paraqesë “sfida të paprecedentë” për sistemet e shëndetit publik, veçanërisht gjatë valëve të të nxehtit.
“Shumë më shumë vdekje të lidhura me nxehtësinë priten të ndodhin ndërsa klima ngrohet dhe popullsia plaket, ndërsa vdekjet nga të ftohtit bien vetëm pak”, tha David García-Leon nga Qendra e Përbashkët Kërkimore në Komisionin Evropian.
Vdekjet nga moti i ngrohtë mund të vrasin 129,000 njerëz në vit nëse temperaturat rriten në 3 gradë Celsius mbi nivelet para-industriale. Sot, vdekjet nga nxehtësia në Evropë janë 44,000. Por numri vjetor i vdekjeve nga i ftohti dhe i nxehti në Evropë mund të rritet nga 407,000 njerëz sot në 450,000 në vitin 2100, edhe nëse liderët botërorë arrijnë objektivin e ngrohjes globale prej 1.5 gradë Celsius, zbuloi studimi.
Hulumtimi vjen pas një serie valësh përvëluese të të nxehtit që kanë bërë kërdinë në të gjithë kontinentin. Rezultatet e tij sfidojnë argumentet nga personat që thonë se ngrohja globale është e mirë për shoqërinë sepse më pak njerëz do të vdesin nga të ftohtit.
Edhe në Evropë, kontinenti më i freskët i banuar, jetët e humbura nga nxehtësia do të kompensojnë ato të shpëtuara nga të ftohtit më të butë, zbuloi studimi. Vendet në të gjithë Azinë, Afrikën, Oqeaninë dhe Amerikën po ‘piqen’ në temperatura edhe më vdekjeprurëse.
“Ky hulumtim është një kujtesë e numrit të jetëve që ne po rrezikojmë nëse nuk arrijmë të veprojmë mjaft shpejt kundër ndryshimeve klimatike,” thotë Madeleine Thomson, drejtuese e ndikimeve klimatike dhe përshtatjes në organizatën e kërkimit shëndetësor Wellcome, e cila ishte nuk ishte ë përfshirë në studim.
Trefishimi i parashikuar i vdekjeve të drejtpërdrejta nga nxehtësia në Evropë nuk është “as tabloja e plotë”, shtoi ajo, duke treguar kërkimin që lidh nxehtësinë ekstreme me abortet dhe shëndetin mendor më të keq.
“Dhe pastaj janë ndikimet indirekte. Ne kemi parë tashmë se si ngjarjet ekstreme të nxehtësisë mund të shkaktojnë dështimin e të korrave, shkatërrimin për shkak të zjarreve, dëmtojnë infrastrukturën dhe godasin ekonominë, të gjitha këto do të kenë efekte të dëmshme në jetën tonë.”
Studiuesit modeluan të dhëna në 854 qytete për të vlerësuar vdekjet nga temperaturat e nxehta dhe të ftohta në të gjithë kontinentin. Ata zbuluan se nxehtësia do të vriste më shumë njerëz në të gjitha pjesët e Evropës, por se barra më e rëndë do të binte mbi vendet e Evropës Jugore si Spanja, Italia dhe Greqia, si dhe disa pjesë të Francës.
Ata parashikuan se numri i vdekjeve nga temperaturat e larta do të rritet me 13.5% nëse planeti nxehet 3 gradë Celsius, duke çuar në 55,000 vdekje shtesë. Shumica e atyre që vdesin do të jenë më të vjetër se 85 vjeç.
Elisa Gallo, epidemiologe mjedisore në ISGlobal e cila ka studiuar vdekshmërinë nga nxehtësia në Evropë tha se është gjithnjë e më e rëndësishme përshtatja ndaj nxehtësisë në rritje.
Studiuesit inkurajuan qeveritë të marrin në konsideratë politika për të reduktuar numrin e vdekjeve, të tilla si investimi në spitale, krijimi i planeve të veprimit dhe izolimi i ndërtesave. Ata theksuan se rritja e parashikuar e vdekjeve ishte nxitur nga ndryshimet në strukturën e popullsisë dhe klimën e Evropës.
“Nëse duam të shmangim arritjen e skenarit më të keq, është thelbësore të trajtojmë rrënjën e problemit duke adresuar emetimet e gazeve serrë,” tha Gallo.
Studiuesit arritën në përfundimin se përpjekjet për t’u përshtatur duhet të fokusohen në rajonet me papunësi të lartë, varfëri, ndryshime strukturore ekonomike, emigracion dhe popullsi në plakje. Ata thanë se zona të tilla ishin më pak të afta për t’u përshtatur me dëmtimet klimatike dhe gjithashtu u goditën më rëndë nga rritja e vdekjeve nga nxehtësia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
