.png)
Nga Gazeta ‘SI’ – Gjatë 24 orëve të fundit janë regjistruar 24 vatra zjarri në 16 bashki të vendit, ndër të cilat Elbasan, Finiq, Delvinë, Selenicë, Vlorë, Tiranë, Vorë, Krujë, Has, Mat, Malësi e Madhe, Kurbin, Korçë, Poliçan dhe Gjirokastër.
Edhe pse zjarri te mbetjet në Elbasan u raportua se u neutralizua plotësisht, Ministria e Mbrojtjes bën me dije sot, se vijon puna intensive në këtë vatër alarmante prej ditësh tanimë.
“Gjatë ditës së djeshme u punua kryesisht me hedhjen e inerteve dhe kapsulimin e mbetjeve, ndërsa një grup ekspertësh ishte në terren për matjen e ndotjes së ajrit. Forcat operacionale do të vijojnë punën për shuarjen përfundimtare edhe gjatë ditës së sotme“, thuhet në njoftimin zyrtar.
Për ngjarjen, prokuroria e Elbasanit ka nisur një hetim për të përcaktuar shkaqet e ndotjes dhe origjinën e zjarrit. Deri më tani, as për këtë rast dhe as për rastet e mëparshme, nuk ka një shkak zyrtar të konfirmuar për shpërthimin e flakëve.
Ndërkohë, aktive janë edhe pesë vatra të tjera:
Grazhdan–Malçan (Finiq): intensiteti i zjarrit ka rënë; po monitorohet nga dy automjete zjarrfikëse dhe stafi pyjor.
“Sotiran” (Orikum, Vlorë): ndërhyrje me një automjet zjarrfikës dhe tre efektivë të Shërbimit Vendor.
Bulticë (Vaqarr, Tiranë): terreni i vështirë po sfidon ndërhyrjen; forcat me mbështetje nga 40 efektivë të FA vijojnë punën.
Gjinaj–Domaj (Has): flakët në pyll pishe ndeshen me terrenin malor dhe erën e fortë.
Zgërbonjë (Poliçan): operacioni u rifillua me dy automjete zjarrfikëse dhe shtatë efektivë.
Në total janë djegur rreth 7 hektarë bimësi të ulët.
Në tre incidente të veçanta, vatrat kanë përfshirë dy banesa në Vorë dhe Tiranë dhe një ndërtesë në Korçë, duke shkaktuar dëme materiale. Për shuarjen e flakëve janë angazhuar 34 automjete zjarrfikëse, 399 forca operacionale, 53 mjete të rënda dhe 40 efektivë të Forcave të Armatosura me pajisje shtesë.
Instituti i Gjeoshkencave parashikon reshje të dobëta lokale, por rreziku nga zjarret mbetet “i lartë” në shumicën e qarqeve (disa zona të Durrësit, Korçës e Vlorës në nivel “të moderuar”). Strukturat e mbrojtjes civile janë në gatishmëri të plotë dhe bëjnë thirrje për kujdes maksimal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
