.png)
Një variant i ri i koronavirusit po përhapet në shumë pjesë të botës dhe vjen me një simptomë jo shumë të dëgjuar më parë: dhimbje fyti që ndjehet sikur në fyt ke një brisk.
Varianti, NB.1.8.1, është identifikuar si shkaku i rishfaqjes së Covid-19 në Kinë dhe disa vende të tjera aziatike. Ekspertët në Europë parashikojnë një rritje të mundshme të rasteve.
Sipas Qendrave të SHBA-së për Kontrollin dhe Parandalimin e Sëmundjeve, NB.1.8.1 tashmë përfaqëson rreth një të tretën e rasteve të reja Covid-19 që nga 7 qershori. Kjo është një rritje e konsiderueshme nga vetëm një muaj më parë, kur varianti i ri përfaqësonte vetëm 5% të rasteve të reja Covid-19.
A mund të ndodhë vërtet një valë tjetër verore? A funksionojnë ende vaksinat aktuale, dhe nëse po, kush duhet të marrë në konsideratë marrjen e një doze tjetër tani? Dhe çfarë masash paraprake duhet të marrin njerëzit për të zvogëluar rrezikun e kontraktimit të Covid-19?
Dr. Leana Wen, mjeke e urgjencës dhe profesoreshë në Universitetin George Washington thotë se virusi SARS-CoV-2 është vazhdimisht në mutacion dhe është plotësisht e pritshme që të ketë variante të reja.
“Sa më shumë mundësi t’i jepen virusit për t’u përhapur, aq më shumë mundësi ka për të mutuar.
Ajo tregon se ky variant i ri, NB.1.8.1, i quajtur edhe Nimbus, është një pasardhës i llojit Omicron. Organizata Botërore e Shëndetësisë e ka konsideruar llojin e ri një “variant nën monitorim”. Megjithatë, OBSH raporton gjithashtu se të dhënat e mbikëqyrjes nuk tregojnë se ka rritur ashpërsinë krahasuar me variantet që qarkullonin më parë. Duke pasur parasysh se ky lloj po i tejkalon variantet e mëparshme, është e mundur që të jetë më ngjitës, por nuk ka asgjë që të sugjerojë se po përhapet ndryshe krahasuar me variantet e kaluara.
Sa i përket faktit nëse vaksinat ekzistuese funksionojnë kundër këtij varianti, përgjigjja nuk dihet. OBSH-ja citon të dhëna laboratorike që tregojnë se mund të ketë njëfarë shmangieje imune, që do të thotë se mund të jetë më pak i ndjeshëm ndaj imunitetit të ofruar nga vaksinat ose infeksioni i mëparshëm dhe sugjeron një ulje të mundshme të efikasitetit të vaksinës. Në të njëjtën kohë, NB.1.8.1 është një pasardhës i ngushtë i llojeve të tjera kundër të cilave vaksinat kanë efikasitet.
Cilat janë simptomat e infeksionit N.B.1.8.1?
Ekspertët kanë thënë se varianti i ri vjen me një simptomë që nuk është vënë re shumë më parë, siç është dhimbja e fytit. Ekziston një gamë e gjerë simptomash dhe ashpërsie. Disa pacientë mund të kenë simptoma të ngjashme me alergjinë, të tilla si hundë të bllokuara dhe me rrjedhje. Të tjerë mund të kenë simptoma të ngjashme me ftohjen ose gripin, me ethe, lodhje, dhimbje koke dhe dhimbje muskujsh ose trupi. Disa njerëz mund të zhvillojnë kollë dhe vështirësi në frymëmarrje. Disa mund të kenë të përziera, të vjella ose diarre.
Ndërsa shumica e njerëzve do të shërohen, disa mund të sëmuren rëndë dhe të kërkojnë shtrim në spital. Disa individë që infektohen me Covid-19 mund të zhvillojnë gjithashtu gjendjen post-virale të njohur si Covid i gjatë.
A mund të ndodhë përsëri një valë tjetër verore?
“Po. Mund të shkaktohet nga një variant i ri që është më ngjitës dhe që ka një shkallë të caktuar të shpëtimit imunitar. Një valë gjithashtu mund të ndodhë thjesht për shkak të rënies së imunitetit të popullatës. Disa ekspertë besojnë se shfaqja e këtij lloji të ri mund të fillojë një valë në dy muajt e ardhshëm”, thotë Wen.
Ajo që kemi parë nga disa vite përvojë me Covid-19 është se infeksionet kanë tendencë të vijnë në valë. Valët verore të Covid-19 kanë ndodhur gjatë viteve të fundit. Është sigurisht e mundur që modeli të përsëritet këtë vit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
