Variantet e Covid-19 që po përkeqësojnë situatën

Nga Gazeta Si- Të gjithë viruset dhe në veçanti ato të ARN-së si Coronaviruset, ndryshojnë vazhdimisht përmes mutacioneve pak a shumë të rëndësishme të gjenomit të tyre (gjeneve të tyre) për t'u përshtatur më mirë me njerëzit. Që nga fillimi i pandemisë, mijëra variante të virusit SARS-CoV-2 janë identifikuar në mbarë botën. Shumica dërrmuese e mutacioneve po “kalojnë” dhe kanë pak ndikim në epidemi me ekspertët që thonë se nuk ka asgjë jonormale në faktin që viruset ndryshojnë.

Megjithatë, ndërsa shumica e mutacioneve nuk kanë një ndikim të rëndësishëm, disa mund t'i japin virusit karakteristika që janë të dobishme për të. Midis tyre, një kapacitet më i madh për transmetim nga një person në tjetrin, aftësia për të anashkaluar mbrojtjen e përgjigjes imune (të antitrupave ose vaksinave), ose për të lehtësuar depërtimin e virusit të mutuar brenda qelizave. Në këto raste mutacionet bëhen shkak për shqetësim dhe duhen monitoruar me kujdes.

Duke qenë se tashmë viruset ‘udhëtojnë’ në të gjithë botën, kontrolli i shfaqjes dhe përhapjes së varianteve virale duhet të shtrihet në të gjitha vendet në botë, madje edhe ato me më pak burime ekonomike, për të parandaluar që një përhapje e pakontrolluar në disa zona të planetit të dëmtojë luftën globale kundër pandemisë.

VARIANTI ANGLEZ

I identifikuar për herë të parë në dhjetor 2020 dhe i njohur gjithashtu si B.1.1.7, ai është bërë varianti që qarkullon më shumë në Mbretërinë e Bashkuar, duke prekur mbi 70% të infeksioneve të reja dhe prej andej u përhap në të gjithë Evropën dhe rreth 60 vende të tjera.

Karakterizohet nga një aftësi më e madhe për t'u transmetuar nga njeriu te njeriu (rritja e vlerësuar e transmetueshmërisë është afërsisht 39%) dhe për rrjedhojë ka çuar në një rritje të ndjeshme të numrit të rasteve, shtrimeve në spital dhe presionit mbi sistemin shëndetësor anglez. Duke pasur parasysh aftësinë e këtij varianti për t'u përhapur, për shkak të aftësisë së tij më të madhe për të depërtuar në qelizat e synuara, ai u përhap me shpejtësi në popullatat e tjera evropiane dhe më gjerë.

Në Itali, afërsisht 55% e infeksioneve shkaktohen tani nga varianti anglez, i cili përbën llojin viral mbizotërues në vend, ndërsa variantet e tjera prekin vetëm 5% të rasteve të reja. Në nivel rajonal, varianti anglez është më i pranishëm në Molise (93.3%), Sardenjë (75%), Liguria (72.7%), Abruzzo (70%), Campania (59.3%), Emilia Romagna 41%.

Megjithatë, një variant merr rreth 3 muaj nga shfaqja e tij e parë për të arritur 80% të rasteve në një rajon të caktuar.

Vëmendje e veçantë për mbajtjen e përhapjes rrjedh nga njëra anë nga njohja ende e dobët e manifestimeve klinike që shkakton dhe nga ana tjetër, studime të shumta janë duke u zhvilluar për të përcaktuar nëse sëmundja e shkaktuar nga ky variant është më serioze se COVID-19 me të cilin jemi përballur deri më tani.

VARIANTI AFRIKANO-JUGOR

Ky (varianti B.1.351.V2) u identifikua gjithashtu në dhjetor 2020 dhe tani është më i përhapuri në Afrikën e Jugut. Ashtu si ai anglez, ai gjithashtu ka një aftësi më të madhe për të transmetuar nga një person në tjetrin, megjithëse më pak se ai i variantit anglez.

Që nga janari i vitit 2021, ai ka qenë i izoluar në të paktën 20 vende të tjera evropiane dhe ka prekur gjithashtu njerëz që nuk kanë qenë në Afrikën e Jugut. Kjo sugjeron që ky variant është në të vërtetë më i përhapur se sa mendohej.

Në Itali prezenca e tij duket të jetë ende e kufizuar në 0.5%. Megjithatë, është dokumentuar në infeksionet e gjetura në Lazio (Frosinone), Liguria (Genova), Abruzzo (Pescara), Lombardi, provincën autonome të Bolzanos dhe Sicilisë.

VARIANTI BRAZILIAN

Varianti brazilian u identifikua fillimisht në Brazil në janar 2021, por prania e tij u raportua menjëherë në Japoni dhe Korenë e Jugut. Në Itali, vlerësimet konsiderojnë se infeksionet nga varianti brazilian prekin afërsisht 4.3% të popullsisë.

Studimet kanë demonstruar një transmetueshmëri dhe prirje më të madhe ndaj riinfeksionit.

Në qytetin Manaus (Amazon) një studim zbuloi se mesatarisht 76% e dhuruesve të gjakut kishin tashmë antitrupa kundër SARS-CoV-2 nga një epidemi e mëparshme në tetor 2020.

Megjithatë, varianti brazilian u përhap gjithsesi, duke shkaktuar shumë infeksione të rënda dhe shumë vdekje. Një studim hipotezon se varianti brazilian mund t'i rezistojë antitrupave tek njerëzit që duhet të kenë njëfarë imuniteti, sepse ata tashmë janë imunizuar nga një infeksion i mëparshëm Coronavirus.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.