Gazeta Si – Partizani dhe Vllaznia luajtën sot ndeshjen e parë gjysmëfinale të Kupës së Shqipërisë në “Elbasan Arena”, ku barazuan 0-0. Fundi i kësaj ndeshjeje u shoqërua me polemika të forta dhe tension, sepse Vllaznisë iu anulua një gol i shënuar nga Aralica në kohën shtesë.
Vendimi i arbitrit Ferataj dhe VAR-it për anulimin e këtij goli me argumentin e një faulli të sulmuesit kroat ndaj Belicës është kundërshtuar fort nga shkodranët, të cilët kishin mendim të kundërt. Madje, ata nuk deshën ta lejonin arbitrin as të shkonte në monitorin e VAR-it, pasi ishin të bindur se nuk kishte asgjë për të parë aty.
Ndeshja pati shumë raste për shënim në të dyja portat, pasi të dyja skuadrat e kërkuan fitoren, por pa ia arritur qëllimit. Partizani u ndal nga shtylla, e goditur nga sulmuesi Skuka, që tentoi edhe disa herë të tjera, por pa mundur ta gjente rrjetën. Kualifikimi për në finale do të vendoset në ndeshjen e kthimit në Shkodër.
Gjysmëfinalja tjetër e Kupës së Shqipërisë mes Teutës dhe Laçit u luajt të mërkurën dhe u fitua nga kurbinasit me rezultatin 1-2.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
