Shoqata Federale e Shkollave Fillore në Gjermani paralajmëron në lidhje me valën e gjerë të gripit në nivel federate, se mund të ketë mbyllje të shkollave fillore.
“Gjendja e personelit në shumë shkolla fillore në vend është e vështirë”, tha kreu i shoqatës, Edgar Bohn për rrjetin redaksional gjerman, Redaktionsnetzwerk Deutschland, RND.
“Mbyllje të plotë të shkollave nuk mund dhe nuk dua ta përfytyroj por kjo mund të jetë pasojë për disa prej tyre. Ndërsa kufizimet e orëve të mësimit nuk do të përjashtohen”, tha ai.
Sipas Intitutit Robert Koch në Gjermani vërehet një rritje e ndjeshme e sëmundjeve të organeve të frymëmarrjes, më shpesh fëmijët preken nga virusi, RSV, virusi respirator sincitial.
Gjendje e vështirë edhe në kopshte
Sidomos në kopshtet gjermane paraqitet gjendje e vështirë e personelit për shkak të valës së gripit.
“Aktualisht shumë kopshte janë duke luftuar të kompensojnë mungesën në numër të madh të personelit”, u shpreh drejtuesja e Shoqatës Gjermane të Kopshteve, Waltraud Weegmann për RND. Ndërsa zëdhënësja e organizatës joqeveritare, “Arbeiterwohlfahrt”, Jennifer Rotter foli për një “gjendje të vështirë” të kopshteve për shkak valës aktuale të sëmundjeve të dimrit që pritet të përkeqësohet.
“Redukimi i orëve të hapjes së kopshteve deri tek mbylljet afatshkurtra për shkak të mungesës së personelit aktualisht janë bërë rregull dhe nuk janë më përjashtim”, bëri të ditur ajo.
Sipas Weegmann duhet të merren masa urgjente për shkak të mungesës së ndjeshme të personelit të kualifikuar në kopshte. Duhet të nxitojmë, tha ajo, “ndryshe nuk do të kemi më krizë kopshtesh, por kolaps të plotë të kopshteve.”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
