Danil Medvedev është si një tren, që ecën drejt në rrugën e tij. Tenisti rus, numri 2 në botë, që ëndërron të përballet dhe hakmerret ndaj Novak Gjokoviçit, – i cili e mundi në finalen e “Australian Open” në fillim të vitit, – është gjysmëfinalisti i parë i US Open. Kështu ndodhi edhe vitin e kaluar, kur rusi u mund në gjysmëfinale nga Thiem, që më pas u shpall kampion i turneut.
Këtë herë ishte surpriza Botik Van de Zandshulp, holandezi që tentoi pa sukses të ndalte rusin në çerekfinale. Ndeshja përfundoi me rezultatin 3-1 (6-3, 6-0, 4-6, 7-5) dhe ndryshe nga ndeshjet e luajtura deri tani, Medvedev e lejoi kundërshtarin të fitonte një set. “Në fakt, ishte ai që bëri disa gjëra ndryshe nga dy setet e para, – tha pas ndeshjes Medvedev. – Shërbeu mirë, më krijoi probleme me gjuajtjet e tij”.
Holandezi në fakt ka eliminuar rivalë të nivelit të lartë, si Kasper Rud dhe Diego Shvartzman. Por ndaj Medvedevit iu desh të kënaqej vetëm me fitimin e një seti dhe komplimentet e numrit 2 në botë. Gjatë mbrëmjes do të ndeshen në çerekfinale Feliks Auger Aliasime dhe 18-vjeçari Karlos Alkaraz.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
