.png)
Socialistët justifikojnë Këshillin e Emërimeve në Drejtësi dhe Kuvendin me shkeljen e Kushtetutës dhe të ligjeve të miratuara në kuadër të reformës në drejtësi për procedurën e përzgjedhjes dhe emërimit të anëtarëve të Gjykatës Kushtetuese me “urgjencën” e kthimit në funksion të kësaj gjykate.
Në seancën plenare të kësaj të enjte, në rendin e ditës është edhe votimi nga deputetët i Altin Binajt si anëtar të Gjykatës Kushtetuese. Binaj është i vetmi kandidat në listën e dorëzuar nga KED në Kuvend, nga të paktën 3 emra që ky institucion duhej të kishte dorëzuar.
Kjo do të thotë se deputetët janë përballë faktit të kryer, pasi sipas parashikimit të nenit 125 të Kushtetutës, edhe nëse deputetët nuk arrijnë që ta votojnë Altin Binajn brenda afatit 30 ditor, ai zgjidhet automatikisht anëtar i Gjykatës Kushtetuese.
Nga deputetët e opozitës parlamentare kjo “anomali” u vu në dukje. Ralf Gjoni tha se kjo çështje nuk duhej të ishte përfshirë në rendin e ditës.
“Sipas Kushtetutës KED duhet të dërgojë një listë me 3 emra. Unë kam një fletë votimi vetëm me 1 emër. Kushtetuta më detyron të zgjedh 1 nga 3 emrat në listë. Dua të di se pse është futur një fletë e tillë votimi me 1 emër. Pse neve sot duhet të votojmë siç bëmë përpara 1 viti. Dua të votoj realisht për një anëtar të Gjykatës Kushtetuese, por nuk dua ta bëj në kundërshtim me ligjin”, u shpreh ai.
Nënkryetarja e Kuvendit, Vasilika Hysi nuk e mohoi se KED dhe Kuvendi ndodheshin në shkelje të Kushtetutës në këtë rast, por deklaroi se Altin Binaj ka marrë miratim unanim në Komisionin e Ligjeve si kandidaturë dhe se rikthimi i Gjykatës Kushtetuese në funksion është një nga kushtet e vendosura për hapjen e negociatave.
“Bëmë një seancë dëgjimore dhe Komisioni i Ligjeve për herë të parë i dha pëlqimin kandidaturës. Kuvendi i Shqipërisë e ka rishpallur vendin e lirë për këtë pozicion 4 herë. 3 herët e para nuk ka mundur të përzgjedhë 1 kandidat. Kuvendi i Shqipërisë e shpalli për herë të katërt dhe KED propozoi 1 kandidat. Vlerësimi i të gjitha kritereve për Altin Binajn ka qenë i lartë pasi bëhet fjalë për një kandidat karriere. Është mbajtur nën zbatim dhe opinioni i Venecias. Kuvendi ka vlerësuar se funksionimi i Gjykatës Kushtetuese është jetike, kërkohet nga të gjitha faktorët ndërkombëtar. Në këto rrethana është vlerësuar që të kandidojë dhe një kandidat. Nëse dëshirojmë që të kemi Gjykatë Kushtetuese funksionale ne duhet të japim votën dhe ta votojmë kandidatin i cili është në rastet e pakta që mori votë unanime”, u shpreh ajo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
