Ura e Zogut në rrezik shembjeje / Shoqëria civile kërkon marrjen e masave për të ndaluar degradimin

Nga Gazeta Si- Rrënimi i Urës së Matit dhe mungesa e reagimit nga institucionet ka bërë që aktivistët e shoqërisë civile që e kanë ndjekur këtë kauzë prej afro 4 vitesh të dalin në një reagim.

Aktivistët shprehen se kërkojnë ndërhyrjen emergjente për shpëtimin e kësaj trashëgimie, ashtu siç u premtua.

“Do të qëndrojmë të vendosur për ndjekjen e kësaj kauze e do të shkojmë deri në kallëzime penale për çdo drejtues institucioni që ka nën përgjegjësi Urën e Matit”, thanë ata.

Përfaqësues të Organizatës Sebastia thanë për median se është e disata herë që reagojnë për mbrojtjen e Urës së Matit, pasi nuk kanë mjaftuar të gjitha thirrjet e mëparshme prej janarit të vitit 2021 me hartimin e peticionit, i cili u nënshkrua nga 3054 qytetarë, 3 protesta, dhjetëra kërkesa për informacion drejtuar institucioneve përgjegjëse dhe përfshirjen e saj në programin 7 monumentet më të rrezikuara në Evropë nga Europa Nosta.

LEXO EDHE:
-7 vendet e trashëgimisë më të rrezikuara në Europë, mes tyre dhe Ura e Zogut
-Më në fund do të nisë rehabilitimi i Urës së Zogut
-Ura me shumë harqe dhe një rrëfenjë e shpërfilljes

“Më 14 shkurt 2023 Kryeministri Rama publikoi projektin për ndërhyrjen emergjente në strukturën e dëmtuar të kësaj ure, duke u shprehur se ky projekt do të financohej dhe zbatohej brenda këtij viti. Përgjatë këtyre 8 muajve pritje, i jemi drejtuar disa here me kërkesa për informacion Ministrisë së Kulturës dhe Institutit Kombëtar të trashëgimisë kulturore të cilat vazhdimisht përgjigjen se janë në proces tenderimi, por nuk na kanë bëre me dije afatet e tenderimit dhe kur fillon ndërhyrja. Me fillimin e reshjeve kjo ndërhyrje bëhet më e vështirë dhe Ura e Zogut është më e rrezikuar se kurrë”, thonë përfaqësuesit e Organizatës, duke shtuar se kanë të njëjtat kërkesa që kanë pasur deri tani.

“Kur mbyllen afatet e tenderimit? Kur fillon puna për zbatimin e projektit? Mbetemi të vendosur për ta ndjekur deri në fund këtë kauzë që nuk cenon vetëm kurbinasit por historinë, trashëgiminë dhe identitetin kombëtar“, tha aktivistja.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.