UNICEF: Mbi 35 mijë shqiptarë do të futen në varfëri nga lufta në Ukrainë, mes tyre dhe 9 mijë fëmijë

10:22 - 18 Tetor 2022

Nga Gazeta ‘SI’ – UNICEF ka parashikuar se 35.413 shqiptarë do të futen në varfëri ndikuar nga kriza momentale, 9.061 prej të cilëve janë fëmijë.

Sipas peshës në popullsinë totale, 1.5% e fëmijëve do të futen në varfër dhe 1.2% e të rriturve. Kjo është shifra e dytë më e lartë në rajon, pas Kosovës, ku është parashikuar të futen në varfëri 3.7% e fëmijëve dhe 2.1% e të rriturve.

Në Serbi, listës së të varfërve, pritet t’i shtohen 28 mijë persona, në Bosnjë 17 mijë, në Maqedoninë e Veriut 5.5 mijë, në Mal të Zi, 913.

Nga kriza dhe efektet zinxhir të saj, UNICEF parashikon se vdekshmëria tek foshnjat do të rritet me 0.08% dhe fëmijët do të humbasim 743 vite shkollë.

Raporti i UNICEF tregon se rajoni i Europës Qendrore pati një zinxhir goditjesh që sollën rritje të numrit të të varfërve. Kriza globale financiare 2008, aneksimi i Krimesë në 2014, zhvlerësimi i rublës në 2015 dhe pandemia Covid-19 në 2020, dëmtuan tregjet dhe zinxhirët e furnizimit, ulën remitancat dhe ndikuan në rënien ekonomike.

10.4 milionë njerëz në total do të futen në varfëri në rajonin e Europës Qendrore, 4 mln nga të cilët janë fëmijë nën 18 vjeç dhe ¾ nga Rusia.

Rritja e varfërisë tek fëmijët është 19% më e lartë se ajo që ishte parashikuar nëse nuk do të kishte luftë. Në total, do të humbasin 117 mijë vite shkollimi, 2 mijë fëmijë do të mungojnë nëpër shkolla këtë vit.

Vdekshmëria tek foshnjat do të shkojë në 8 për 100.000 lindje.

Më herët gjatë korrikut, OKB në një tjetër raport tha se në Shqipëri, 90 mijë qytetarë rrezikojnë të kalojnë në kufirin e varfërisë, për shkak të krizës së çmimeve që preku sektorin e hidrokarbureve dhe produktet ushqimore.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.