.png)
Gazeta Si – Gjykata e Posaçme ja vendosur masën e sigurisë “arrest në burg” ndaj ish-kreut të bandës së Durrësit Lulzim Berisha, i ekstraduar dy ditë më parë nga Spanja.
Pas ekstradimit nga Spanja 2 ditë më parë, Berisha doli sot në gjyq, ndërkohë që mbrojtjen ia bëri avokati i tij, i cili përmendi dhe të penduarin e drejtësië, Luftar Reçin.
Gjatë seancës, Berisha kundërshtoi akuzat e bazuara në dëshminë e bashkëpunëtorit të drejtësisë, Luftar Reçi.
“Nuk e njoh fare atë njeri, nuk e kam takuar asnjëherë. Nëse më provoni një kontakt, më dënoni sa të doni. Njëlloj siç më ra akuza tjetër, njëlloj do të bjerë edhe kjo”, – tha ai.
Berisha akuzohet për veprat penale “Vrasja me paramendim”, “Vrasja në rrethana cilësuese”, kundër 2 ose më shumë personave dhe “Mbajtja pa leje dhe prodhimi i armëve, armëve shpërthyese dhe i municionit”, të kryera në formën e grupit të strukturuar kriminal.
Ndaj tij rëndojnë akuza për ngjarje të ndodhura në vitet 2004-2005 me tre të vrarë e tre të plagosur. Fillimisht u shpall në kërkim në 2020-ën për vrasjen e Vajdin Lames dhe Klodian Saliut, vrasje të vitit 2005, të cilët u zbardhën 15 vite më vonë.
Për vrasjen e Lames, fillimisht çështja u pushua për mungesë provash, ndërsa aktualisht ishte në kërkim vetëm për Klodian Saliun, i cili u vra në rrugën Durrës-Maminas, në fshatin Koxhaj, teksa po lëvizte me makinën “Mercedes Benz”.
Ish-kreu i bandës së Durrësit u arrestua në dhjetor 2023 në Spanjë pas shkëmbimit të informacioneve me autoritetet e drejtësisë shqiptare. Ai mbante dokumente bullgare, ndërsa u prangos gjatë aksionit të koduar “Sant Joan”
Në vitin 2016 ai arriti të dilte nga burgu pa e mbyllur dënimin prej 25 vitesh, duke u liruar me kusht nga Gjykata e Shkallës së Parë në Durrës me pretendimet se kishte probleme shëndetësore.
Por, Gjykata e Lartë rrëzoi vendimin e lirimit të tij me kusht për vrasjen e Klodian Saliut. Ai u ekzekutua në rrugën Durrës-Maminas, në fshatin Koxhaj teksa po lëvizte me makinën “Mercedes Benz”.
Anëtarët e bandës së Durrësit u dënuan për vepra të rënda penale si “vrasjes me paramendim” të kryer në kuadër të “grupit të strukturuar kriminal” dhe “armëmbajtje pa leje të armëve të zjarrit”. 16 anëtarët e grupit u dënuan në total me 245 vjet burgim nga ish-Gjykata për Krimet e Rënda.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
