.png)
Gazeta Si – Gjykata e Posaçme (GJKKO), ka lënë në burg Edison Muçekun, 33-vjeçarin i cili u ekstradua pak ditë më parë nga Britania ku ishte arrestuar pasi ishte shpallur në kërkim për një tentativë vrasje në Bulqizë.
Në maj 2020, Muçeku ka tentuar të vrasë Hamza Terziun, i cili u godit me armë. Në maj të vitit të kaluar SPAK lëshoi disa urdhër arreste në kuadër të operacionit të koduar ‘Revanshi” pas zbardhjes së disa përgjimeve në “Sky Ecc”, ku flitej për eliminime mes grupeve kriminale.
Ndaj Muçekut, i arrestuar në Mançester në janar 2025, rëndon akuza për veprën penale të sigurimit të kushteve për kryerjen e vrasjes së mbetur në tentativë.
Muçeku ka mohuar akuzën e bërë ndaj tij, ndërsa avokati i të riut pretendoi se provat e siguruara falë përgjimeve në “Sky Ecc”, janë të paligjshme.
Sipas SPAK-ut, Edison Muçeku bashkë me Hektor Xheçukën, një tjetër të kërkuar, akuzohen se kanë qëlluar me armë zjarri drejt banesës në Bulqizë së Terziut me 21 maj 2020.
Muçeku njihet si pjesëtar i grupit të Hektor Xheçukës, 36-vjeçarit nga Burreli të njohur me nofkën “Tori”, një prej besnikëve të biznesmenit të zhdukur të lojërave të fatit, Ervis Martinaj.
Dhe për Xheçukën ka një urdhër arresti të lëshuar nga SPAK, nën akuzën e tentativës për vrasje dhe pjesëmarrjes në grup kriminal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
