.png)
Gazeta Si – Hallkat e drejtësisë në Shkodër duket se kanë lehtësuar dënimin e autorit të masakrës së kësaj të hëne, 8 shtator në Shkodër, Ragip Gila, i cili vetëm pak kohë pasi ishte liruar nga burgu për akuza penale të rënda.
I riu nga Shkodra në vitin 2023 u arrestua, pasi policia zbuloi në banesën e tij një arsenal armësh, municion, jelekë antiplumb dhe sasi droge.
Në një vendim të Gjykatës së Shkodrës, thuhet se Ragip Gila ka qenë i dënuar me 5 vjet burg për prodhim dhe shitje të narkotikëve, por i është ulur në 3 vjet e 4 muaj burg dhe më 4 mars të këtij viti, gjykata ka pezulluar ekzekutimin e dënimit me burg, duke e liruar me kusht, që për 5 vite të mos bëjë asnjë vepër penale dhe me shërbim prove.
Në banesën ku jetonte Gila, iu gjetën sende që ka dyshime se përdoreshin për qëllime kriminale, përfshirë 7 jelekë anti-plumb, 2 palë doreza, 3 maska, 2 paruke, municion luftarak, 1 kokore metalike, 1 armë gjahu dhe sende të tjera të kundërligjshme, si dhe sasi lënde të dyshuar narkotike kanabis.
Ai u dënua me 5 vite, por përfitoi zbritjen me 1/3 për shkak të gjykimit të shkurtuar vetëm për lëndë narkotike.
Ende nuk dihet pse në vendimin e dënimit të tij nuk janë përllogaritur edhe veprat e tjera penale.
Kështu, Gila nuk ka vuajtur as 1.5 vite të plota dënim për një vepër penale që parashikohej 5-15 vite.
Në dhjetor 2023, Gila u kap në flagrancë me:
jelekë antiplumb, maska dhe paruke,
armë gjahu dhe municion luftarak,
si dhe sasi lëndësh narkotike.
Për këto, ai u procedua për veprat penale:
“Prodhimi dhe shitja e narkotikëve” (parashikon 5 deri në 15 vjet burg),
“Prodhimi dhe mbajtja pa leje e armëve luftarake dhe municionit” (5 deri në 15 vjet burg), si dhe “Prodhimi dhe mbajtja pa leje e armëve të gjuetisë dhe sportive”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
