.png)
Gazeta Si – Gjykata e Posaçme ka lënë në “arrest shtëpie”, Pandeli Bozhën, babain e kandidates së PSD Limonera Bozhën, pasi dyshohet nga SPAK se ka blerë vota për të bijën.
Vetë kandidatja ishte e pranishme në seancën ku u konfirmua masa e arrestit për të atin, por mohoi që akuzat të jenë të vërteta.
“Nuk jemi përfshirë në gjëra të tilla, kështu që koha do ta provojë edhe këtë”, – u shpreh Bozha.
Pandeli Bozha, i njohur edhe si Agrim Brahimllari u arrestua nga policia për krime zgjedhore në një qendër votimi të Fierit, ku edhe vajza e tij kandidonte për ligjvënëse nën siglën e Partisë Social Demokrate.
Masa e dhënë nga Gjykata e Posaçme Kundër Korrupsionit dhe Krimit të Organizuar erdhi për shkak të moshës së shtyrë dhe gjendjes së rënduar shëndetësore të Bozhës.
Sipas burimeve zyrtare nga Prokuroria, ngjarja ka ndodhur më 8 maj, kur Bozha i ka ofruar një shtetasi një shumë parash dhe një fletë votimi të ngjashme me atë zyrtaren, ku ishte theksuar me ngjyrë portokalli emri i së bijës, duke i kërkuar mbështetje në zgjedhje.
Ndaj personit me të cilin ka komunikuar Bozha është marrë masa e procedimit në gjendje të lirë, ndërsa organi i akuzës po heton nëse kemi të bëjmë me një rast të mirëorganizuar të shitblerjes së votës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
