Gazeta Si – Gjykata e Posaçme ka pranuar kërkesën e SPAK dhe ka pushuar çështjen në ngarkim të Selim Çekajt, i akuzuar si i dyshuar për trafik droge.
Selim Çekaj, i cili është babai i Arbër Çekajt, ishte i dyshuar për trafikimin e 49 kg kokainë nga Amerika Latine në drejtim të Shqipërisë më 1 prill të vitit 2021.
Çështja fillimisht u hetua nga Prokuroria e Durrësit dhe më pas kaloi për kompetencë në SPAK. Pas hetimeve, SPAK nuk gjeti prova për të provuar lidhjen e Selim Çekajt dhe kompanisë së tij “ECOALMAX” në përfshirjen e trafikut të drogës.
Selim Çekaj është babai i Arbër Çekajt, ky i dënuar me 14 vite burg për trafikimin e 613 kg kokainë, sasia më e madhe e kapur ndonjëherë në vendin tonë në magazinat e kompanisë së tij të bananeve ‘Arbri Garden’ në Maminas.
Edhe në kontejnerin me banane të porositur nga babai i tij, u gjet kokainë, por që nuk u provua përfshirja e Selim Çekajt në këtë çështje.
SPAK kishte kërkuar edhe më herët pushimin e çështjes, por Gjykata e Posaçme e kishte kthyer për të kryer edhe disa veprime të tjera hetimore.
Gjatë kohës së hetimit, Selim Çekaj ndodhej pa masë sigurie.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
