Gazeta Si - Nojer me shokë janë përmbysur nga Sarbryken, pas avantazhit të Tomas Myler. Goli i pësuar në minutën e 96-të vendosi rezultatin në 2-1, duke bërë që bavarezët të dalin nga Kupa e Gjermanisë që në turin e dytë të saj.
Vazhdon raporti i hidhur i Tomas Tuhel me Kupën e Gjermanisë. Vitin e kaluar Bajerni u eliminua në çerekfinale, pak ditë pasi trajneri ishte ulur në stolin bavarez. Tani eliminohet që në 1/16-at dhe nga një skuadër e Ligës 3.
Nuk imagjinohej që Bajerni të dilte nga skena që në turin e dytë të DFB-Pokal, Kupa e Gjermanisë. Në fushë ishte një Bajern eksperimental, me Tel dhe talentin Kratzig mes titullarëve. Të besuarit e Tuhel humbën 2-1 ndaj Sarbryken, një skuadër e ligës së 3-të, ku mban vendin e 15-të dhe lufton për mbijetesë.
Tomas Myler shënoi golin e avantazhit për Bajernin. Pas 3 minutash u dëmtua de Ligt dhe në fushë u fut Laimer në mbrojtje. Në minutën e 46-të Sontheimer barazoi shifrat. Në pjesën e dytë, futja e Musialas, Gnabrit dhe Komanit nuk e çoi Bajernin te fitorja dhe në minutën e 6-të shtesë erdhi goditja fatale.
Marcel Gaus, mbrojtësi i krahut të Sarbryken, 34 vjeç, realizoi golin e fitores dhe eliminoi Bajernin, që turpërohet kështu, edhe pse kishte 75% të kontrollit të topit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.