.png)
Gazeta Si – Trupi i dekompozuar dhe i panjohur që iu kthye autoriteteve ukrainase me formulimin e thjeshtë “trupi 757, mashkull i paidentifikuar” i përket, sipas hetuesve, Viktoriia Roshchyna, një gazetare e pavarur ukrainase e cila u zhduk në gusht 2023 në territoret e pushtuara nga Rusia.
Lajmi u raportua nga gazeta “Ukrainska Pravda”, me të cilën Roshchyna bashkëpunoi dhe u konfirmua nga një hetim i gjatë i kryer nga Prokuroria e Përgjithshme e Ukrainës.
Sipas raporteve, Viktoriia u kap duke punuar në një investigim dhe u mbajt rob për muaj të tërë. Vetëm në maj 2024, Rusia pranoi për herë të parë se e kishte arrestuar. Disa muaj më vonë, më 10 tetor, Ukraina konfirmoi vdekjen e saj në paraburgim rus.
Më 14 shkurt 2025, gjatë një shkëmbimi trupash, eshtrat e saj u kthyen në gjendje të avancuar dekompozimi dhe pa identifikim.
Por ekspertiza mjeko-ligjore ukrainase bëri të qartë se bëhej fjalë për një grua. Testimi i ADN-së konfirmoi identitetin me 99% siguri: ishte Viktoriia. Në trup u gjetën shenja të qarta torture: gërvishtje, mavijosje, brinjë të thyera dhe indikacione në përputhje me përdorimin e goditjeve elektrike.
“Plagët u shkaktuan kur ajo ishte ende gjallë”, – tha Yurii Bielousov, kreu i Departamentit të Luftës në Zyrën e Prokurorit të Përgjithshëm të Ukrainës.
Hipoteza është se Viktoriia i është nënshtruar dhunës sistematike gjatë robërisë së saj. Akoma më shqetësues ishte zbulimi i bërë gjatë ekzaminimit pas vdekjes: mungonin disa organe të brendshme, duke përfshirë trurin, bebet e syrit dhe një pjesë të trakesë.
Një mjek ligjor ndërkombëtar, i konsultuar nga “Ukrainska Pravda”, spekuloi se heqja e këtyre organeve mund të ketë qenë e qëllimshme, për të fshehur prova të qarta të mbytjes.
Projekti “Viktoriia”, i promovuar nga “Forbidden Stories” me mbështetjen e gazetave ndërkombëtare si “Guardian”, “Washington Post”, “Le Monde” dhe “Der Spiegel”, iu kushtua kujtimit të gazetares 27-vjeçare.
Projekti synon të hedhë dritë mbi fatin e gazetarëve dhe civilëve të ndaluar në Rusi dhe në territoret e pushtuara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
