.png)
Gazeta Si – Qeveria amerikane ka përjashtuar telefonat inteligjentë, ose “smartphone”, kompjuterët dhe pajisjet e tjera elektronike nga tarifat e reja: tarifat fillimisht kishin për qëllim dhjetëra vende, por presidenti i SHBA-ve, Trump përfundimisht vendosi t’i linte ato vetëm për Kinën. Ky është një vendim shumë befasues, i marrë tre ditë pas hyrjes në fuqi të tarifave të reja.
Tarifat për mallrat kineze të importuara në Shtetet e Bashkuara ishin rritur deri në 145 për qind, një vendim që kishte shkaktuar shqetësim të madh në tregjet financiare.
Ndër sektorët më të goditur do të kishte qenë ai i teknologjisë, duke qenë se shumë kompani të mëdha, si Apple, prodhojnë një pjesë të madhe të produkteve të tyre në Kinë.
Tani, qeveria amerikane ka publikuar një listë të produkteve që do të përjashtohen nga tarifat, duke përfshirë materiale të ndryshme teknologjike.
Përjashtimet u komunikuan nga Dogana dhe Mbrojtja Kufitare e SHBA-ve, agjencia kryesore e zbatimit të ligjit në SHBA që merret me kontrollet kufitare dhe doganore.
Ndër produktet e përjashtuara nga detyrimet, përveç telefonave inteligjentë dhe kompjuterëve, janë hard disqet, procesorët, tabletët, televizorët, kartat e kujtesës, panelet diellore dhe makineritë për prodhimin e gjysmëpërçuesve.
Qeveria amerikane nuk ka dhënë ende një arsye për vendimin e saj për të përjashtuar këto produkte dhe nuk dihet nëse dëshiron t’i përjashtojë plotësisht ose nëse dëshiron të vendosë tarifa më të ulëta se ato të vendosura për mallrat e tjera të importuara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
