Trump pushon gjysmën e punonjësve të Departamentit të Arsimit, pse i shpalli luftë shkollave?

Gazeta Si – Gjysma e punonjësve të Departamentit Amerikan të Arsimit do të pushohen nga puna. Lajmi u njoftua së fundmi nga Sekretarja e Arsimit e SHBA-ve, Linda McMahon, ish-presidente dhe CEO e kompanisë së WWW, e thirrur nga Trump për të çmontuar departamentin dhe për të transferuar të gjitha përgjegjësitë tek shtetet individuale.

Kur televizioni “Fox News” pyeti nëse pushimet nga puna ishin hapi i parë drejt mbylljes së departamentit, McMahon tha “po”.

Të pushuar me email

Pas këtyre shkurtimeve, Departamenti Federal i Arsimit, i cili kishte 4,133 punonjës në fillim të vitit, do të ketë një fuqi punëtore afërsisht gjysmën e kësaj shifre.

Pushimet nga puna, siç raportohet nga gazeta “New York Times”, iu komunikuan punonjësve përmes emaileve të dërguara pas orës 18:00 të martën më 11 mars.

Kështu, më shumë se 1,300 punonjës do të pushohen nga puna: shkurtimet prekin “të gjitha divizionet”, tha departamenti.

Pse Trump kërkon të mbyllë departamentin

Javët e fundit, mediat amerikane kanë raportuar një draft të një urdhri ekzekutiv nga Trump që i kërkon McMahon “të marrë të gjitha masat e nevojshme” për të lehtësuar mbylljen e departamentit “në masën maksimale të përshtatshme dhe të lejuar me ligj”.

Por për ta mbyllur atë përfundimisht, presidenti duhet të marrë miratimin e Kongresit dhe 60 votat e Senatit.

Pra, ka gjasa që në vend që ta mbyllë, presidenti do të vendosë ta dobësojë sa më shumë që të jetë e mundur përmes shkurtimeve drastike të personelit, programeve dhe subvencioneve.

Gjë që tashmë po ndodh. Gjatë fushatës elektorale, Trump deklaroi disa herë se donte të mbyllte Departamentin e Arsimit, i cili sipas miliarderit do të shndërrohej në një strofkë të “radikalëve, fanatikëve dhe marksistëve”.

Çfarë bën Departamenti i Arsimit?

Departamenti i Arsimit mbikëqyr programet e huave studentore dhe administron grantet “Pell” që ndihmojnë studentët me të ardhura të ulëta të ndjekin kolegjin.

Shoqata Kombëtare e Arsimit, thekson se afërsisht një në tre studentë të kolegjit, ose më shumë se 6 milionë studentë në mbarë vendin, mbështeten në grantet “Pell” për të paguar shpenzimet e kolegjit.

Më shumë se gjysma, vijnë nga familje që fitojnë më pak se 20,000 dollarë në vit. Departamenti gjithashtu ndihmon në financimin e programeve mbështetëse për studentët me aftësi të kufizuara dhe studentët që jetojnë në varfëri.

Në këtë drejtim, AKM thekson se 95% e nxënësve me aftësi të kufizuara ndjekin shkollat publike dhe financimi nga Departamenti i Arsimit është thelbësor për t’u garantuar atyre mbështetjen që kanë nevojë.

Departamenti është gjithashtu i ngarkuar me zbatimin e ligjeve për të drejtat civile që synojnë parandalimin e diskriminimit në bazë të racës ose seksit në shkollat që marrin fonde federale.

Përshtati: Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.