Trump përmend sërish Kosovën dhe Serbinë: Ndihmuam në uljen e tensioneve

Nga Gazeta ‘Si’- Në një deklaratë të bërë gjatë një konference për media në margjinat e Samitit të NATO-s në Hagë, presidenti i Shteteve të Bashkuara të Amerikës, Donald Trump, përmendi sërish Kosovën dhe Serbinë si shembull të konflikteve që, sipas tij, janë zgjidhur gjatë mandatit të tij.

Kjo është hera e tretë brenda pak ditësh që Trumpi përmend çështjen e Kosovës.

I pyetur rreth situatës në Ukrainë dhe rrezikut të ambicieve territoriale të presidentit rus Vladimir Putin përtej këtij vendi, Trumpi u shpreh se “është e mundur” që Rusia të ketë synime të tjera, por shtoi se disa nga konfliktet më të mëdha ndërkombëtare janë tashmë “nën kontroll” falë ndërhyrjes së tij.

“Në javët e fundit ne u kujdesëm për Indinë dhe Pakistanin, Kosovën dhe Serbinë, Kongo po vjen, Rwanda po vjen. Kjo ishte një luftë e madhe… kokë të prera në të gjithë Afrikën. Askush nuk ka bërë kurrë diçka të ngjashme”, u shpreh Trumpi me ton triumfalist.

Ai shtoi se situata ndërmjet Kosovës dhe Serbisë është ndër ato që “është sjellë në një përfundim”, duke iu referuar rolit të administratës së tij në ndërmjetësimin e dialogut Kosovë-Serbi gjatë viteve të mëparshme.

“Njëjtë edhe me Kosovën e Serbinë, kanë luftuar për vite, dhe siç e dini, e sollëm edhe atë në një përfundim”, theksoi Trumpi.

Kosova u përmend edhe nga sekretari i NATO-s, Mark Rutte, i cili ka folur për rajonin e Ballkanit Perëndimor, konkretisht Kosovën dhe Bosnjë e Hercegovinën.

I pyetur nga një gazetar për mospërmendjen e Ballkanit Perëndimor në deklaratën e Samitit, Rutte ka thënë se NATO-ja vazhdon të jetë e fokusuar në rajon përmes trupave të saj në Kosovë dhe Bosnjë e Hercegovinë.

Rutte ka thënë se KFOR-i vazhdon të jetë në Kosovë dhe EUFOR-i në Bosnjë e Hercegovinë.

“E kam vizituar rajonin, kam pasur bisedime me liderët në Bosnjë dhe Kosovën. Jemi shumë të përfshirë si NATO, si BE gjithashtu është shumë e involvuar. Koordinohemi ngushtë me Kaja Kallas dhe Ursula von der Leyen”, ka thënë Rutte.

“Ne vazhdojmë të jemi aty, asgjë s’ka ndryshuar”, ka shtuar mandej sekretari i NATO-s.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.