Nga Gazeta ‘Si’– Presidenti Donald Trump ka folur rreth procesit të paqes në Ukrainë gjatë një diskutimi në tryezë të rrumbullakët me udhëheqës biznesi.
Sipas mediave të huaja, Presidenti amerikan tha se shkëmbeu “fjalë mjaft të forta” me udhëheqësit europianë gjatë një telefonate për Ukrainën.
“Udhëheqësit e Francës me të cilët folëm, dhe të Gjermanisë e Mbretërisë së Bashkuar, të gjithë udhëheqës shumë të mirë, miq shumë të mirë të mi. Dhe diskutuam për Ukrainën me fjalë mjaft të forta. Dhe do të shohim se çfarë do të ndodhë. Dua të them, po presim të dëgjojmë përgjigje përpara se të përparojmë”, tha Trump.
Trump gjithashtu tha që udhëheqësit europianë i kanë kërkuar që ai të marrë pjesë në një takim gjatë fundjavës në Europë.
“Ne thamë, përpara se të shkojmë në një takim, duam të dimë disa gjëra”, shtoi më tej Trump.
“Ata do të donin që ne të shkonim në një takim gjatë fundjavës në Europë dhe ne do të marrim një vendim bazuar në atë që do të sjellin. Nuk duam të humbasim kohën tonë”, shtoi ai.
I pyetur më tej rreth asaj që Zelensky dëshiron nga një takim i mundshëm, Trump ndryshoi qëndrim dhe në vend të kësaj foli për mundësinë e zhvillimit të zgjedhjeve në Ukrainë.
“Pyes veten se sa kohë do të duhet derisa të kenë zgjedhje. Ka kaluar shumë kohë, nuk kanë pasur zgjedhje për një kohë të gjatë”, tha Trump
Po ashtu Trump tha se sipas një sondazhi të cilin ai nuk e citon qartë, “82% e njerëzve kërkojnë që të arrihet një zgjidhje, populli ukrainas dëshiron që kjo të marrë fund”.
Me komentet e tij përmbyllëse mbi Ukrainën, ai thotë: “Kjo është një luftë që duhet ta zgjidhim, por duhen dy veta për të kërcyer tango.”/ cnn
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
