Gazeta Si – Donald Trump, popullariteti i të cilit po bie në SHBA, shquhet si udhëheqësi më me ndikim në Evropë.
Ndërsa po humbet vrull në vend për shkak të kostos së lartë të jetesës dhe politikave të tij anti-emigracion (ai vetë e pranoi për herë të parë dy javë më parë: “Sondazhet e mia janë pak më poshtë”), ai kryeson listën e njerëzve më të fuqishëm në Kontinentin e Vjetër të përpiluar nga faqja e internetit “Politico Europe”.
Në listën – të përpiluar çdo vit nga gazeta në bashkëpunim me institutin “Public First” – vendi i parë i shkon miliarderit, i cili me sa duket nuk ka nevojë të ulet në tavolinat në Bruksel për t’i ndikuar ato: askush nuk ka më shumë ndikim në vendimet e marra në kryeqytetet e kontinentit.
Kjo sugjeron që Europa shihet më shumë si në mëshirën e agjendave të njerëzve të tjerë, sesa si një forcë e aftë të ndikojë në pjesën tjetër të botës.
Sondazhi online, i cili përfshinte mbi 10,000 të anketuar nga SHBA, Kanada dhe tre ekonomitë më të mëdha evropiane – Gjermania, Franca dhe Mbretëria e Bashkuar – tregon se evropianët ndajnë të njëjtin mendim me Trump se udhëheqësit e tyre janë të dobët dhe e konsiderojnë presidentin e SHBA-së më të vendosur.
Paradoksi është, pra, se personi që konsiderohet më i fuqishëm në politikën evropiane nuk është evropian. Presidentja e Komisionit Evropian, Ursula von der Leyen u rendit vetëm në vendin e shtatë.
E dyta pas Trumpit, por europiania e parë në renditje, është kryeministrja daneze, Mette Frederiksen, një socialdemokrate me qëndrime të krahut të djathtë mbi menaxhimin e kufijve.
Ajo favorizon ndalimin e azilkërkuesve dhe përshpejtimin e riatdhesimeve, në përputhje me kryeministren italiane Giorgia Meloni, e cila u rendit e nënta, pas Sekretarit të Përgjithshëm të NATO-s Mark Rutte, por përpara kryeministrit britanik, Keir Starmer.
Në vendin e tretë është Friedrich Merz, njeriu që thyen tabutë e pasluftës në Gjermani, sipas “politico.eu”.
Ai është simboli i rimëkëmbjes së Europës nga kërcënimi rus, kancelari i cili – me një politikë masive të riarmatimit dhe riaktivizimin e ushtrisë – po udhëheq ripozicionimin e Gjermanisë nga një fuqi ekonomike në një lidere mbrojtëse për një Evropë që tani është e detyruar të kujdeset për veten.
Në vendin e katërt është Marine Le Pen, në pozicionin kryesor, pavarësisht dënimit që kërcënon ta skualifikojë atë nga zgjedhjet e ardhshme presidenciale franceze.
Ajo është shumë përpara shefit aktual të Pallatit Élysée, Emmanuel Macron, i cili është vetëm i 19-ti: presidenti francez shihet nga votuesit e tij si një lider që deri më tani ka dështuar të menaxhojë në mënyrë efektive presidentin e paparashikueshëm amerikan.
Përpara Macron, është Volodymyr Zelensky i rraskapitur, i cili u rendit i katërmbëdhjeti. Por Vladimir Putin është i pesti: një përmbledhje shqetësuese e ekuilibrit (të perceptuar) të pushtetit në kontinent.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
