Gazeta Si – Policia e Tiranës ka zbardhur dhe arrestuar 3 autorët e dyshuar që vendosën një sasi të vogël tritoli në 30 janar një zyrë noterienë pronësi të shtetases Esmeralda Dauti.
Në një ngjarje tjetër kriminale, ata dyshohet se kanë vendosur një sasi tritoli në një lokal në kryeqytet tetorin e vitit të kaluar.
Në një konferencë për mediat, kreu i policisë së Tiranës, Tonin Voçaj tha se në pranga kanë rënë 3 persona, të cilët vepronin kundrejt pagesës, ndërsa 2 të tjerë u shpallën në kërkim.
“Më datë 04.02.2024, nga strukturat hetimore të Komisariatit të Policisë Nr. 2, u finalizua operacioni policor i koduar “POROSIA”, në kuadër të të cilit u dokumentua me prova ligjore ngjarja e ndodhur më datë 30.01.2024, në një zyrë noteriale në rrugën “Perlat Rexhepi”, ku ka shpërthyer lëndë plasëse. Në kuadër të këtij operacioni, u ndaluan shtetasit: Real Zefi, 33 vjeç, banues në Shkodër; Korrado Katana, 33 vjeç, banues në Durrës; Eno Flamuraj, 36 vjeç, banues në Korçë. Gjithashtu u shpallën ne kërkim 2 shtetas. Shtetasit e mësipërm, në bashkëpunim me njëri-tjetrin, më datë 30.01.2024, kanë vendosur sasi lënde plasëse në një zyrë noteriale dhe pas ngjarjes, autorët kanë lëvizur me motomjetin e shtetasit Eno Flamuraj. Më pas, motomjetin e kanë braktisur në liqenin e Farkës dhe pas kësaj janë larguar me automjetin tip “Audi”, të shtetasit Korrado Katana”, tha Vocaj.
Të njëjtët persona rezultojnë po ashtu autorë të vendosjes së një sasie lënde plasëse në një lokal në rrugën “Prokop Mima”, ngjarje e ndodhur në tetor të vitit të lamë pas, po në kryeqytet.
“Nga veprimet hetimore të kryera ka rezultuar se këta shtetas janë autorë të dyshuar të ngjarjes së ndodhur më datë 05.10.2023, në rrugën “Prokop Mima”, ku në lokalin e shtetases Sh. Gj., është vendosur një sasi lënde eksplozive”, shtoi Vocaj.
Nga hetimet rezulton se të arrestuarit e kanë vendosur lëndën eksplozive, kundrejt pagesës. Sa i përket porositësve dhe shkaqeve, ato mbeten ende të panjohura dhe policia vijon punën hetimore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
