Tregu i kriptomonedhave në rënie të lirë

Orët e fundit kanë qenë të vështira për tregun e kriptomonedhave pas një korrigjimi brutal që shkaktoi humbje të mëdha në asetet digjitale. Bitcoin, BTC, kriptomonedha më e madhe ra në 66 mijë dollarë .

Ethereum, kriptomonedha e dytë më e madhe, ra në 3.4 mijë dollarë, duke zhbërë progresin e para një jave. Edhe kriptot e tjera dytësore patën një dobësim.

Por pse po rrëzohet tregu i kriptove?

Disa faktorë kanë dorë në këtë rënie të fortë. Tërheqja e fitimeve nga investitorët është një nga shkaqet kryesore të kësaj rënieje, pasi ata kërkojnë të sigurojnë fitimet e tyre pas një periudhe rritjeje. Për më tepër, daljet neto të parave nga bursa ETF-të e Bitcoin në Shtetet e Bashkuara kanë rritur presionin në rënie në treg. Një faktor tjetër kritik ishte forcimi i dollarit amerikan, i shkaktuar nga pasiguria politike pas vendimit të papritur të presidentit francez Emmanuel Macron për të thirrur zgjedhje të parakohshme. Kjo situatë bëri që tregtarët t'i drejtoheshin dollarit, duke dobësuar kështu çmimin e Bitcoin, i cili tradicionalisht ka një korrelacion të anasjelltë me monedhën amerikane.

Fjalimet e fundit të zyrtarëve të Rezervës Federale të SHBA (FED) kanë ndikuar gjithashtu në tregun e kriptove. Kryetari i FED Jerome Poëell foli me një ton më të rreptë, duke sinjalizuar rritje të kufizuara të normave të interesit për vitin 2024, gjë që uli entuziazmin e investitorëve për aktivet me rrezik si kriptomonedhat. Njëkohësisht, u vërejtën likuidime masive, me 245 milionë dollarë pozicione të likuiduara në 12 orë, duke përfshirë 225 milionë dollarë në pozicione të gjata, duke rritur presionin e shitjes.

Kjo rënie çmimi ka implikime të ndryshme për tregun e kriptove. Nga njëra anë, ajo pasqyron ndjeshmërinë e shtuar të tregut ndaj faktorëve makroekonomikë dhe lëvizjeve institucionale të kapitalit. Nga ana tjetër, disa analistë e shohin këtë korrigjim si një mundësi blerjeje, veçanërisht për altcoin që po testojnë nivelet kryesore të mbështetjes. Tendenca aktuale tregon se tregu i kriptove mund të vazhdojë të luhatet bazuar në zhvillimet ekonomike globale dhe politikat monetare. Investitorët duhet të jenë të kujdesshëm dhe të monitorojnë sinjalet e rimëkëmbjes ose rënies së mëtejshme.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.