Nga Gazeta 'Si'- Sot në Gjykatën Speciale të Prishtinës do të mbahet seanca fillestare për çështjen penale të sulmit terrorist në Banjskë.
Në këtë fshat të komunës së Zveçanit, grupe të armatosura serbësh sulmuan policinë e Kosovës më 24 shtator, duke vrarë policin Afrim Bunjaku.
Në gjyqin që ka nisur nga ora 09:30 janë paraqitur edhe tre terroristët që u arrestuan një vit më parë pas sulmit në Banjskë.
Vladimir Toliç, Blagoje Spasojeviç dhe Dushan Maksimoviç mbërritën mëngjesin e kësaj të mërkure në Gjykatën Themelore të Prishtinës për seancën përgatitore për ngjarjen të shoqëruar nga forca të shtuara të policisë elitare të Kosovës.
Në seancën përgatitore në rastin e sulmit terrorist të Banjskës po marrin pjesë si palë të dëmtuara edhe tre efektivët e policisë së Kosovës.
Alban Rashiti, Çlirim Shaqiri dhe Mirsad Kryeziu u plagosën teksa i përgjigjeshin sulmit të grupit të armatosur serb, së bashku me Afrim Bunjakun e ndjerë.
Javë më parë, Prokuroria Speciale ngriti aktakuzë kundër 45 personave për vepra të rënda penale për sulmin e 24 shtatorit, duke nënvizuar se Milan Radoiçiç ishte organizatori i sulmit.
Sipas aktakuzës, të akuzuarit përmes përdorimit të dhunës dhe armatimit të rëndë, tentuan të shkëpusin pjesën veriore të Kosovës dhe ta bashkojnë me Republikën e Serbisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.