Dy aksidente më pasojë plagosjen e tre personave kanë ndodhur këtë të shtunë nëpër rrugët e Jugut të vendit.
Një nga aksidentet ka ndodhur në autostradën Levan-Tepelenë në vendin e quajtur Sheqmusalala.
Burime policore fierake thonë se një automjet ka qene duke udhëtuar, teksa ka dalë nga rruga dhe për pasojë kanë mbetur të plagosur Arqile Pjetri 73 vjeç dhe kunata e tij, Pranvera Bejo, e cila po merr mjekim në spitalin e Fierit.
Drejtuesi i mjetit ka thënë se rripat e sigurimit i kishin të vendosur, por ka qënë një përgjumje në drejtimin e mjetit, çka ka bërë të humbi kontrollin
Aksidenti tjetër ka ndodhur aksin rrugor Dukat-Babicë, në rrugën e Bypass-it, në vendin e quajtur “Kryqëzimi i Tragjasit”,
Dy automjete janë përplasur me njëra-tjetrën dhe për pasojë ka mbetur e plagosur një pasagjere, e cila u bllokua në automjet.
Menjëherë në vendngjarje ka mbërritur shërbimi TNT i planizuar në këtë aks rrugor, të cilët në bashkëpunim me shërbimin zjarrfikës, kanë përdorur pajisjet përkatëse për këto ndërhyrje, duke bërë të mundur nxjerrjen e shtetases së dëmtuar dhe drejtuesit të mjetit “Peugeot”, si dhe kanë dhënë ndihmën e parë deri në mbërritjen e shërbimit mjekësor.
Dhe, nisur nga fluksi shumë i lartë i automjeteve drejt zonave bregdetare dhe turistike, si dhe nga shkeljet e shumta të evidentuara gjatë monitorimeve me dronin edukues dhe mjete inteligjente, shërbimet e Policisë Rrugore po intensifikojnë monitorimet me qëllim parandalimin e aksidenteve rrugore.
Në të gjitha akset rrugore nacionale, në qendrat urbane dhe në zonat turistike janë shtuar patrullat e lëvizshme, duke përdorur mjete inteligjente shpejtësimatëse, poliskanë, radarë automatikë, dronë të cilësisë së lartë, dragera dhe teleskopë.
Si rezultat i monitorimit në të gjitha akset rrugore, gjatë një jave:
- Janë pezulluar 156 leje drejtimi për shpejtësi mbi normat e lejuara, për drejtim të mjetit në efektin e alkoolit/në gjendje të dehur dhe për qarkullim në sens të kundërt.
- Janë arrestuar 40 drejtues mjetesh, për drejtim mjeti në gjendje të dehur dhe për drejtim të mjetit pa leje drejtimi.
Gjithashtu, në të gjithë vendin janë vendosur 21 593 masa administrative, nga këto: - 6123 për shpejtësi tej normave të lejuara;
- 1345 për përdorim të celularit gjatë drejtimit të mjetit;
- 1226 për mospërdorim të rripit të sigurimit;
- 2105 për parakalime të gabuara;
- 290 për mosvendosje të kaskës mbrojtëse;
- 111 për manovra të rrezikshme në rrugë;
- 229 për drejtim të mjetit në efektin e alkoolit;
- 9054 për parkim të gabuar;
- 1110 për shkelje të tjera.
Policia Rrugore apelon për të gjithë drejtuesit e automjeteve dhe motomjeteve, për zbatim me rigorozitet të rregullave të qarkullimit rrugor, për përdorim të rrugëve alternative, për qëndrim në radhë kur ka ngadalësim të lëvizjes së automjeteve në raste fluksi, t’u japin përparësi këmbësorëve dhe të mos kryejnë parakalime të gabuara apo manovra të rrezikshme në qendrat urbane dhe akset nacionale.
Gjithashtu, drejtuesit e kamionëve të zbatojnë me rigorozitet kufizimet e lëvizjes gjatë fundjavës dhe festave zyrtare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
