.png)
Gazeta Si – Gjykata e Posaçme Kundër Korrupsionit dhe Krimit të Organizuar (GJKKO), ka dënuar këtë të enjte me katër vjet burg avokatin Radovan Çela.
Çela, duke qenë se përfiton nga gjykimi i shkurtuar, do të vuajë 2 vjet e 8 muaj heqje lirie. Radovan Çela u vetëdorëzua në polici në fillim të marsit, pasi qëndroi për disa muaj në arrati.
Ai akuzohet nga SPAK se është përfshirë në korrupsion dhe ushtrim ndikimi të paligjshëm në dosjen e njohur si “Zarka”.
SPAK thotë se Çela dhe magjistratja Eriona Daupaj, u përfshinë në korrupsion dhe ndikuan drejtësinë për disa çështje mes të cilave në zbutjen e rrethanave për të hetuarit në dosjen e Toyota Auris dhe disa pasuri të Suel Çelës.
Dosja në fjalë lidhet me sekuestrimin e 3.4 milionë eurove të fshehura në dy automjete tip “Toyota Auris” në Portin e Durrësit, një çështje e cila ka përfshirë disa emra të njohur të drejtësisë shqiptare.
Për të njëjtën dosje, u dënua disa ditë më parë me 4 vjet burg, ish-kreu i Prokurorisë së Vlorës, Aurel Zarka, i cili për shkak të gjykimit të shkurtuar përfiton ulje dënimi dhe do të vuajë 2 vite e 8 muaj burg.
Pjesë e hetimeve janë edhe dyshimet e SPAK se avokati dhe ish-kryeprokurori kanë ndërhyrë edhe në dosjen e të shumëkërkuarit Suel Çela për t’i liruar pasuritë e sekuestruara nga OFL.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
