Gazeta Si – Një fluturim i “Delta Airlines” nga Minneapolis i SHBA-ve, u rrëzua gjatë uljes në aeroportin “Pearson” në Toronto, Kanada, duke u kthyer përmbys në një pozicion të pazakontë.
Autoritetet e aeroportit thanë në platformën “X”, se të gjithë 80 personat në bordin e avionit, i operuar nga filiali “Endeavour Air” me një “Bombardier CRJ900”, ishin identifikuar dhe evakuuar.
Avioni kishte 76 pasagjerë dhe katër anëtarë të ekuipazhit. Numri i të plagosurve nga aksidenti është 18, tre prej tyre, dy të rritur dhe një fëmijë, mësohet se janë në gjendje të rëndë, edhe pse autoritetet pohojnë se deri tani nuk ka asnjë viktimë.
Miraculous that all 80 passengers survived today's crash-landing in Toronto. pic.twitter.com/Iu249zQUvq
— Molly Ploofkins (@Mollyploofkins) February 18, 2025
Një prej pjesëtarëve të ekuipazhit, postoi një video ku tregon momentin e rrëzimit të avionit duke shkruar: “Aeroplani ynë u rrëzua. Është me kokë poshtë. Shumica e njerëzve duket se janë mirë. Të gjithë po zbresim”.
Pamjet televizive treguan se trupi i avionit u përmbys në pistë. Todd Aitken, shefi i zjarrfikësve në Aeroportin “Pearson” të Torontos, raportoi se në momentin e aksidentit dukshmëria në aeroport ishte e kufizuar, por se pista ishte e pastër dhe e thatë dhe se erërat e forta nuk po frynin në drejtim të kundërt.
Ndaj, arsyet e përmbysjes së avionit mbeten ende për t’u sqaruar dhe janë objekt hetimi nga Autoriteti Kanadez i Sigurisë së Transportit.
Dy pista në aeroportin ndërkombëtar do të mbeten të mbyllura. Këtë e ka bërë të ditur CEO i aeroportit Deborah Flint. Kjo e fundit shtoi se kanë nisur hetimet, të cilat do të intensifikohen ditët e ardhshme.
Aeroporti Ndërkombëtar Pearson ka rifilluar pjesërisht funksionimin e tij pasi pezulloi përkohësisht nisjet dhe ngritjet pas aksidentit.
Kryeministri i Ontarios, Doug Ford, u shpreh i lehtësuar kur mësoi se nga ky incident nuk pati viktima, duke shtuar gjithashtu se autoritetet lokale treguan gatishmëri për të ofruar ndihmë.
Përplasja është incidenti i katërt i madh i aviacionit në Amerikën e Veriut brenda pak javësh, duke përfshirë një përplasje vdekjeprurëse në ajër midis një aeroplani pasagjerësh dhe një helikopteri ushtarak pranë aeroportit “Ronald Reagan” të Uashington DC, i cili vrau të gjithë 67 personat në bord.
Ndërsa të paktën shtatë persona vdiqën, kur një aeroplan transporti mjekësor u rrëzua në Filadelfia dhe 10 u vranë në një përplasje avioni pasagjerësh në Alaskë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
