Gazeta Si – Me sa duket, Tirana donte ta shijonte titullin e 26-të në historinë e saj në derbin me Partizanin. Pas tre hapash të gabuar radhazi, bardheblutë kanë mundur 1-2 rivalin e përjetshëm në “Elbasan Arena” dhe janë zyrtarizuar kampionë të Superiores tri javë para mbylljes së kampionatit.
Derbi i sotëm, pavarësisht incidenteve të zakonshme me tifozët, me tymuese në fushë dhe ndërprerje të ndeshjes, ishte i mbushur me emocione. Skuka i dha avantazhin Partizanin me një roveshiatë të bukur. Të kuqtë në delir, por ndoshta e nisën festën para kohe, duke harrruar se në derbi situata përmbyset shumë shpejt.
Taulant Seferi barazoi shifrat pa kaluar shumë minuta, duke e ndezur edhe më shumë ndeshjen. Sapo nisi pjesa e dytë, Totre realizoi një gol mjeshtëror me një goditje të kalibruar nga jashtë zonës dhe 1-2. Partizani u mundua të reagonte dhe fitoi një penallti me Skukën, por VAR-i konstatoi një simulim të sulmuesit dhe anuloi penalltinë dhe kartonin e verdhë të Hoxhallarit.
Tirana i gëzohet titullit për sezonin 2021-2022, duke zbritur nga froni Teutën. Një titull plotësisht i merituar, me një skuadër që ka bërë diferencën gjatë gjithë kohës. Prej kohësh drejtuesit e skuadrës bardheblu kanë nisur të mendojnë për një përfaqësim sa më dinjitoz të Tiranës në Europë.
Partizani ndërkohë komplikon llogaritë e Kupave të Europës me këtë humbje, pasi Kukësi dhe Vllaznia mund t’i afrohen me pikë. Një hap i gabuar për skuadrën e Dritan Mehmetit.
Gjatë derbit nuk ka munguar sherri mes dy tifozërive, që janë përplasur me njëra tjetrën, duke ofruar skena vërtet të shëmtuara.
Tifozët e kuq, të irrituar pas humbjes, kanë shkulur stolat e stadiumit në Elbasan dhe i kanë hedhur në pistë. U desh ndërhyrja e forcave të policisë për të qetësuar situatën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
