Lacio ka mundur 2-1 Parmën dhe ka marrë “biletën” e fundit të fazës çerekfinale të Kupës së Italisë, ku do të përballet me Atalantën. Titullarë në këtë ndeshjen ishin portrieri i Kombëtares, Tomas Strakosha, dhe sulmuesi i Kosovës, Vedat Muriqi. Goli i fitores për Lacion erdhi në minutën e fundit, kur Muriqi goditi me kokë dhe topi, pasi u përplas në shtyllë e më pas në kurrizin e portierit Kolombi, përfundoi në rrjetë.
Tomas Strakosha është kthyer titullar dhe duket se përplasja me klubin është lënë pas. Lacio kaloi në avantazh në pjesën e parë me golin e Parolos, që këtë herë luajti në mbrojtje. Skuadra e Inzagit e kontrolloi mirë ndeshjen, por Parma barazoi 7 minuta para fundit. Me fat Strakosha, pasi traversa e ndihmoi në një rast, ashtu si dhe Muriqin në minutën e 90-të, kur kosovari u bë protagonist i kualifikimit me autogolin e portierit kundërshtar. Muriqi goditi shtyllën edhe në fillim të ndeshjes.
Strakosha është vlerësuar me notën 6.5 për paraqitjen e bërë në këtë 90-minutësh, kurse Muriqi me notën 6. Në çerekfinale ata do të ndeshen me Atalantën e Berat Gjimshitit. Tani mbetet të shihet, nëse portieri kuqezi do të kthehet titullar edhe në kampionat, apo do të qëndrojë në stol.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
