Gazeta Si – Një punonjës policie në Tiranë është plagosur gabimisht nga kolegu i tij, teksa ky i fundit po përgatitej për stërvitje. Ngjarja ka ndodhur ditën e enjte (15 Shkurt) në ambientet e Njësisë së Sigurisë Publike Tiranë.
Policia thotë se inspektori K.Ç., gjatë përgatitjes për stërvitje iu shkrep arma e shërbimit nga pakujdesia dhe plagosi në këmbë kolegun e tij Xh.L., i cili u dërgua në spital ku ndodhet jashtë rrezikut për jetën.
Ndërkohë, punonjësi i policisë K.Ç. është pezulluar nga detyra. Menjëherë është ngritur grupi hetimor në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë dhe veprimet procedurale për këtë rast po kryhen nga AMP.
Drejtoria e Standardeve Profesionale ka filluar një hetim të thelluar administrativ për mosrespektimin e procedurave standarde për mbajtjen dhe administrimin e armëve të brezit, nga punonjësit e Policisë.
Në përfundim të këtyre veprimeve, Prokuroria, Policia Gjyqësore dhe AMP kanë nisur procedimin penal në gjendje të lirë, për punonjësin e Policisë K. Ç., për plagosje nga pakujdesia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
