Gazeta Si – Tirana i ka bërë nisjen e duhur vitit 2023. Kampionët në fuqi kanë fituar 1-2 në Laç dhe i janë afruar përkohësisht vendit të parë në vetëm 1 pikë. Një fitore me përmbysje kjo për skuadrën e Shehit.
Laçi kaloi shumë shpejt në avantazh me Vasil Shkurtajn, duke e bërë një malore më të fortë ndeshjen për Tiranën. Megjithatë, kryeqytetasit gjetën forca dhe barazuan në fundin e pjesës së parë me mbrojtësin Bruno Lulaj.
Sapo nisi pjesa e dytë, Hasani shënoi golin e dytë dhe të fitores për Tiranën. Një sukses shumë i rëndësishëm për bardheblutë, në një transfertë të vështirë dhe pas disa problemeve që skuadra kaloi kohët e fundit. Me këtë fitore Tirana ngjitet në kuotën e 28 pikëve, 1 më pak se Partizani që luan sot me Vllazninë.
Duhet veçuar për këtë ndeshje rikthimi në fushë i mesfushorit të ri të Tiranës, Klevi Qefalia. Pas atij dëmtimi të tmerrshëm që pësoi në Rrogozhinë, ai është kthyer në fushën e blertë.
Në barazim pa gola përfundoi ndeshja në Ballsh mes Bylisit vendës dhe Kukësit. Të dyja skuadrat luftojnë për mbijetesë në Superiore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
