Gazeta Si – Ndeshja hapëse e javës së 14-të mes Erzenit dhe Tiranës, e zhvilluar në stadiumin e Rrogozhinës, është fituar nga shijakasit, me rezultatin e ngushtë 1-0. Një fitore me vlera për Erzenin dhe një goditje e fortë për Tiranën.
Redon Mihana shënoi golin e vetëm të ndeshjes që në pjesën e parë. Ai realizoi me kokë, pas një krosi nga goditja e këndit. Duhet theksuar se Tirana e dominoi lojën, madje arriti të shënonte dy herë, por të dy golat iu anuluan, i pari për një faull ndaj portierit dhe i dyti për pozicion jashtë loje.
Vendimtare në këtë sfidë ishin edhe disa pritje shpëtimtare të portierit të Erzenit, Hasanbelli. Tirana nuk arrin kështu të shfrytëzojë as fushën asnjanëse për të marrë 3 pikë që do ta afronin me dyshen e kreut të renditjes. Kujtojmë që Erzeni e ka mundur edhe në ndeshjen e fazës së parë të kampionatit.
Skuadra kryeqytetase mbetet në kuotën e 21 pikëve, 6 pikë larg kreut, ndërkohë që Partizani dhe Egnatia nuk i kanë luajtur ende ndeshjet e tyre dhe për më tepër të kuq të kanë edhe një ndeshje tjetër të paluajtur, atë me Teutën që nga java e parë. Dhe ndeshja e radhës për Tiranën është derbi me Partizanin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
