Gazeta Si – Kastrioti i “mrekullive” ka mundur sot edhe Tiranën për javën e 30-të të Superiores, me rezultatin 0-1. Një gol i afrikanit Onanuga ka bërë që kryeqytetasit të shtyjnë festën e titullit kampion. Kur kanë mbetur edhe 6 javë kampionat, ata janë 15 pikë larg vendit të dytë.
Tirana është rikthyer në “Selman Stërmasi”, në shtëpinë e saj, por nuk mundi t’i kënaqë tifozët me një fitore. Krutanët ndërkohë vazhdojnë serinë e fitoreve dhe nga skuadër mbijetese, tani po i afrohen zonës europiane.
Dinamo dhe Skënderbeu i janë afruar edhe më shumë Kategorisë së Parë. Si blutë, ashtu edhe korçarët, janë mundur në ndeshjet, që ishin konsideruar si “treni i fundit” i qëndrimit në Superiore. Dhe janë mundur nga rivalë direktë, Egnatia dhe Teuta, duke e thelluar diferencën e pikëve dhe duke pritur matematikën për të çertifikuar rënien.
Rrogozhinasit fituan në Korçë me një gol të Imerit, por duhet theksuar se ndeshja u kushtëzua nga një karton i kuq i dhënë me VAR për korçarët. Berisha, i ndëshkuar fillimisht me të verdhë, e la skuadrën me 10 vetë për një faull të rëndë ndaj kundërshtarit.
Dinamo pësoi humbjen e 5-të radhazi në Elbasan, ku Teuta mori 3 pikët falë një gabimi të rëndë të portierit Simoni, i cili i dhuroi topin Hebajt. Blutë patën pretendime në dy raste për penallti, por në asnjë rast arbitri Laver Alla nuk u dha të drejtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
