Gazeta Si – Tirana dhe Partizani janë në kërkim të golave për sezonin e ri. Dy klubet e kryeqytetit kërkojnë të afrojnë patjetër një sulmues kalibri, i cili do të garantonte golat për objektivat sezonalë.
Tirana është zhgënjyer nga braziliani Devid Silva, sidomos nga paraqitja e tij në kupat e Europës. Po ashtu, Taulant Seferi, shënuesi më i mirë i kampionëve sezonin e fundit, është shumë pranë kalimit në një kampionat të huaj.
Në këto kushte, Tirana e ka të domosdoshëm afrimin e një sulmuesi me kualitet dhe eksperiencë. Emri që është lakuar ditët e fundit është ai i Vasil Shkurtaj, që veshi fanellën e Kukësit sezonin e fundit.
Edhe Partizani kërkon një sulmues me peshë. Braziliani Stenio Zhunior është larguar dhe si zëvendësues të tij drejtuesit e klubit të kuq kanë piketuar shkodranin Sindrit Guri, por ende nuk ka gjë konkrete.
Guri është larguar së fundi nga Shkëndija e Tetovës, ku luajti sezonin e fundit. Megjithatë, sulmuesi preferon një aventurë tjetër jashtë vendit para Partizanit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
