.png)
Kanë mbetur pesë ditë deri në skadimin e ultimatumit të Kongresit (shitet te një pronar jo-kinez ose mbyllet në Shtetet e Bashkuara) dhe në pritje të një vendimi nga Gjykata e Lartë e thirrur për të vendosur nëse do t’i jepet një zgjatje rrjetit social të Pekinit para ndalimit të tij, shfaqet mundësia e një zhvillimi të bujshëm: sipas agjencisë Bloomberg, qeveria kineze po shqyrton mundësinë e transferimit të kontrollit të TikTok te Elon Musk, i cili tashmë zotëron një rrjet të madh social, X (ish-Tëitter).
Burimet që i dhanë lajmin agjencisë amerikane thonë se jemi ende në një plan paraprak ku po shqyrtohen disa hipoteza dhe nuk është marrë ende asnjë vendim. Nëse shitja do të realizohej, do të kishte polemika të ashpra. Për zgjerimin e mëtejshëm të pushtetit të Trump-Musk në komunikimin politik dhe për ndërhyrjen e drejtpërdrejtë të qeverisë kineze, pasi për vite me radhë drejtuesit e TikTok kanë pretenduar se janë plotësisht të pavarur nga autoritetet politike. Sipas tyre, frika për ndërhyrje qeveritare për të mbledhur, përmes një platforme me 170 milionë përdorues në SHBA, informacione mbi aktivitetet, zakonet, shpenzimet, interesat kulturore, mënyrat e argëtimit dhe të menduarit të qytetarëve amerikanë është e pabazuar.
Për momentin, asgjë nuk do të ndryshojë: TikTok pret që Gjykata e Lartë të vendosë, e cila pritet të shpallet deri të dielën. Por, siç është raportuar ditët e fundit, nga debatet paraprake midis gjyqtarëve dhe avokatëve të palëve ka dalë një prirje e gjykatësve për të konfirmuar vendimin e Kongresit dhe të qeverisë. Prandaj, ndoshta do të nevojitet një zgjidhje alternative, jo domosdoshmërisht e zbatueshme nga e hëna e ardhshme. Edhe në rast ndalimi, përdoruesit ekzistues të TikTok mund të vazhdojnë ta përdorin platformën, edhe pse cilësia e shërbimit do të përkeqësohet për shkak të bllokimit të përditësimeve të softuerit. Heqja e rrjetit kinez nga dyqanet e aplikacioneve do të pengojë regjistrimin e përdoruesve të rinj.
Ndërhyrja e Musk do të ishte e bujshme, por jo krejtësisht befasuese. Trump u përball me çështjen TikTok edhe gjatë mandatit të tij të parë në Shtëpinë e Bardhë. Ndryshe nga sot, atëherë ai ishte i vendosur ta shpallte rrjetin të paligjshëm. U kërkuan zgjidhje kompromisi dhe në atë kohë hyri në skenë një sipërmarrës aleat i liderit republikan: Larry Ellison, i cili shprehu gatishmërinë për të marrë në menaxhim rrjetin social përmes kompanisë së tij Oracle, pa ia hequr prioritetin pronarit kinez ByteDance. Si alternativë, u propozua një marrëveshje sipas së cilës të gjitha të dhënat e TikTok do të ruheshin në serverë të kontrolluar nga një grup amerikan, për të parandaluar transferimin e tyre në Kinë. Asnjëra nga palët nuk e pranoi në fund këtë zgjidhje.
As marrëveshje dhe as ndalim: mandati i Trump përfundoi dhe çështja TikTok mbeti për një kohë të gjatë margjinale për Biden. Tani që çështja është rishfaqur, do të duhet të shihet se cila është gatishmëria reale e kinezëve (sipas Bloomberg, qeveria e Pekinit mund të jetë përfshirë në çështje pa e informuar as ByteDance, holdingun pronar të TikTok).
Musk është një ndërmjetës i besueshëm, pasi ka interesa të mëdha dhe fabrikën kryesore të Teslës në Kinë, duke qenë një ndërmjetësues natyral mes Pekinit dhe Uashingtonit. Dhe qeveria e Xi Jinping, nëse do të heqë dorë nga TikTok, do ta bëjë këtë si pjesë e një negociate më të gjerë me Trump, nga i cili ka frikë veçanërisht për hakmarrjet tregtare: tarifa të larta doganore që janë kërcënuar disa herë.
Burimi: Corriere Della Sera
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
