.png)
Gazeta Si – Shqipëria është ekipi i vetëm në “Path B” të playoff-it të UEFA-s që nuk ka arritur të kualifikohet asnjëherë në “FIFA World Cup”. Për t’ia dalë për herë të parë, skuadra e Sylvinho-s do të duhet të mundë Poloninë në ½ finale dhe pastaj të kalojë fituesin e ndeshjes Suedi-Ukrainë në Finale.
Në një intervistë për FIFA-n, portieri Thomas Strakosha shpjegoi se si kualifikimi për “FIFA World Cup 2026” do të çonte gjithë Kombin në ekstazë, së bashku me milionat e shqiptarëve që jetojnë jashtë vendit.
I lindur në Athinë dhe i formuar si lojtar në Itali, Strakosha e di se çfarë do të thotë të veshësh fanellën e Kombëtares në një turne të madh. Ndërkohë që ka kaluar netë nën dritat e UEFA Champions League me Lazio-n dhe ka pasur një periudhë në klubin e Premier League, Brentford, ato përvoja zbehen përballë emocioneve të përfaqësimit të Shqipërisë në “UEFA EURO 2024”.
Tani, kur e imagjinon mundësinë e udhëheqjes së vendit të tij drejt Botërorit të parë, ku Grupi F do t’i vendoste përballë Tunizisë, Holandës dhe Japonisë, Strakosha vetëm sa buzëqesh. Më poshtë gjeni intervistën e plotë me portierin e AEK dhe Shqipërisë.
Kjo ½ finale kundër Polonisë mund të jetë hapi i parë drejt realizimit të ëndrrës suaj. Çfarë po mendoni tani?
Të them të drejtën, unë isha i emocionuar edhe para ndeshjes. Për ne nuk është vetëm një ½ finale, është një Finale. Është një ndeshje masive, pasi kemi mundësinë të bëjmë histori për Shqipërinë dhe gjithë Kombin. Të luash për vendin tonë në një Botëror, sidomos në Amerikë ku jetojnë kaq shumë shqiptarë, do të ishte një ëndërr jo vetëm për mua, por për të gjithë.
Nga Polonia, Suedia dhe Ukraina, ju jeni ekipi i vetëm që nuk ka marrë pjesë në një Botëror më parë. A do të ndihmojë fakti që jeni “outsiders” në aspektin psikologjik?
Të jem i sinqertë, po, ne jemi jashtëzakonisht “outsider” dhe historia e provon këtë. Por besojmë se kemi atë që duhet. Nuk është rastësi që kemi arritur deri këtu. Ne e meritojmë të jemi këtu. Jemi plotësisht të vetëdijshëm që Polonia, krahasuar me ne, gjendet më lart në renditje, por premton të jetë një ndeshje shumë konkurruese. Për ne, është një Finale, ashtu siç është për ta.
Polonia ka një sulmues cilësor si Robert Lewandowski dhe një ekip plot talente. Si planifikoni t’u prishni punë atyre?
Janë një nga skuadrat më të organizuara që kam përballuar vitet e fundit. Kanë lojtarë me cilësi të lartë: Lewandowski është emri i parë që më vjen në mendje, dhe gjithashtu Piotr Zielinski, për të cilin kam shumë respekt. Sipas mendimit tim, ata janë një nga kombëtaret më të forta të “nivelit të dytë”, jo shumë prapa ekipeve kryesore si Franca, Italia dhe Spanja. Ne kemi fatin të kemi një sulmues me potencial të madh si Armando Broja. Nëse ai arrin të luajë rregullisht, rreth 30-40 ndeshje në sezon, mund të bëjë hapin drejt nivelit tjetër. Na duhen patjetër lojtarë me nivelin e tij, që mund ta kthejnë një përmbys ndeshjen.
Fushata juaj në “UEFA EURO 2024” tregoi se mund të përballeni me çdo ekip. Çfarë keni mësuar nga ajo përvojë?
Isha jashtëzakonisht i lumtur që pata mundësinë të luaja kundër ekipeve kaq të forta; doja të shikoja se ku qëndronim. Mendonim se do të ishim jashtë nivelit tonë, por në fund, u përballëm me ta siç duhet. Mund të kishim marrë lehtësisht një fitore kundër Kroacisë. Ishte një përvojë e jashtëzakonshme, në nivel me atmosferën më emocionuese që kam përjetuar në karrierën time.
Sylvinho është në krye të ekipit që nga viti 2023. Si do të përmbledhni pikat e tij kryesore dhe në çfarë fushe jeni përmirësuar si ekip?
Ai na ka mësuar të besojmë më shumë në vetvete, ndërkohë që na ka mbajtur me këmbë në Tokë. E dimë që mund të kishim bërë më mirë në disa ndeshje, por ai na ka dhënë besim të madh dhe një shtysë reale para eleminatoreve për në Botëror. Që kur ai është në krye, kemi bërë hapa të mëdhenj përpara. Ka sjellë stabilitet të vërtetë në skuadër. Nuk keni shumë kohë bashkë me Kombëtaren gjatë vitit, kështu që është thelbësore të keni një bazë të fortë. Sot, jemi një njësi më e lidhur dhe e dimë se çfarë jemi të aftë të bëjmë.
Si shumë nga bashkëlojtarët tuaj, ju keni lindur jashtë vendit. Mund të shpjegoni se çfarë do të thotë të përfaqësoni vendin tuaj?
Është një burim i jashtëzakonshëm krenarie. Ne u rritëm duke respektuar dhe dashur rrënjët dhe trashëgiminë tonë. Edhe nëse ke lindur apo u rrite jashtë vendit, ndjen një lidhje të fortë. Është një nder i madh të luash për Shqipërinë. Nuk kam pasur asnjëherë dyshime, edhe pse mund të kisha luajtur për Greqinë. Prindërit e mi gjithmonë më mësuan ti respektoj të gjithë, por edhe të kem një dashuri të thellë për vendin tim. Jam mirënjohës ndaj Shqipërisë për përvojat që më ka dhënë, dhe kurrë nuk më ka vajtur në mendje të luaja për dikë tjetër.
Mund ta imagjinoni atmosferën në Tiranë dhe në gjithë Shqipërinë nëse arrini në Botërorin e verës 2026?
Madje nuk mund ta filloj ta imagjinoj se si do të ishte. “Euro 2024” ishte fantastik, por një Botëror, sidomos në Amerikën e Veriut, do të ishte diçka tjetër. Do të ishte një festë për shqiptarët kudo në Botë. Madje nuk dua ta mendoj ende, as fazën e grupeve. Tani për tani, duhet të përqendrohemi tek ndeshja jonë kundër Polonisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje